စကြာဝဠာအနန္ဒ၌ရှိကြကုန်သော လူ၊နတ်၊ဗြမ္မာ၊သတ္တဝါအားလုံးတိုသည် ကိုယ်စိတ်နှစ်ဖြှာချမ်းသာကြပါစေ၊ကောင်းကျိုးလိုရာစန္ဒ ပြည်ဝကြပါစေ...







“ဝါခေါင်လပြည့် မေတ္တာအခါတော်နေ့ မေတ္တာအကြောင်း သိမှတ်ဖွယ်ရာများ”




•••••••••••••••••••••••••••••••••••••••••••••••
ဝါခေါင်လပြည့်နေ့ကို မေတ္တာအခါတော်နေ့အထိမ်းအမှတ်အဖြစ် ကျင်းပရခြင်းမှာ-
“မေတ္တသုတ် ဖြစ်ပေါ်လာပုံ သမိုင်းကြောင်း”နှင့် ဆက်စပ်၍ ကျင်းပခြင်း ဖြစ်ပါတယ်။

❖(၁)။မေတ္တာသည် ပါဠိဝေါဟာရဖြစ်၍ မြန်မာလို ချစ်ခြင်းဟု အဓိပ္ပါယ်ရ၏။

❖(၂)။မေတ္တာဓာတ်သည် ကြည်လင်အေးမြ၍ ငြိမ်းချမ်းသောသဘောကို ဆောင်၏။တဏှာကဲ့သို့ နောက်ကျူ
ပူလောင်သော သဘောမျိုး မဟုတ်ချေ။

❖(၃)။မေတ္တာသည် ဗြဟ္မဝိဟာရ တရားလေးပါးတွင် တစ်ပါး အပါအဝင်ဖြစ်၏။

❖(၄)။မေတ္တာသည် အတိုင်းမသိသော သတ္တဝါတို့အပေါ်တွင် အာရုံရောက်၍ “အပ္ပမညာတရား”ဟုတွင်၏။

❖(၅)။မေတ္တာသည် ဈာန်ကို ရနိုင်စေသော “ဗြဟ္မဝိဟာရတရားထူး” ဖြစ်၏။

❖(၆)။မေတ္တာဗြဟ္မစိုရ်ကို ပွါးများနေလျှင် ကမ္ဘာလောကကြီးထာဝရ ငြိမ်းချမ်းနိုင်၏။

❖(၇)။မေတ္တာအကျိုး ၁၁မျိုးကို အဂုင်္တ္တရပါဠိတွင် မြတ်စွာဘုရား ဟောကြားထားပါသည်။

❖(၈)။မေတ္တာပွါးနည်း ၁၁နည်းကို မေတ္တာသုတ်၌မြတ်စွာဘုရား ဟောကြား ထားပါသည်။

❖(၉)။မေတ္တသုတ်မှာ ခုဒ္ဒကပါဌနှင့် သုတ္တနိပါတပါဠိတွင် လာရှိပါသည်။

❖(၁၀)။ငါးရာ့နှစ်ဆယ်ရှစ်သွယ် မေတ္တာပွါးနည်းများကို ပဋိသမ္ဘိဒါမဂ်တွင် ပြည့်စုံစွာ ဟောကြားထားပါသည်။

❖(၁၁)။မေတ္တာကို အဒေါသ၏ပရိယာယ်အဖြစ် ပဋိကတ်ကျမ်းဂန်တို့၌ ဟောကြားထားပါသည်။

❖(၁၂)။မေတ္တာ၏ အဝေးရန်သူမှာ ဒေါသဖြစ်၍၊အနီးရန်သူကား တဏှာလောဘ ဖြစ်လေသည်။

❖(၁၃)။တဏှာရာဂသည် မေတ္တာအယောင်ဆောင်၍ သတ္တဝါကို လှည့်စားတတ်လေသည်။

❖(၁၄)။မေတ္တာသည် ဒေါသ၏ ဆန့်ကျင်ဘက်ဖြစ်၍၊ဒေါသဖက်သူက ကြမ်းတမ်းသလောက်၊
မေတ္တာဖက်သူက ယဉ်ကျေးသိမ်မွေ့လေသည်။

❖(၁၅)။မေတ္တာဓာတ်သည် သီတာရေ နှင့် လရောင်တမျှ အေးမြပြီး၊ဒေါသမှာမူ နေနှင့်မီးပမာ
အပူဓာတ်ကိုသာ ပေးမြဲဖြစ်လေသည်။

❖(၁၆)။ရေမြေခြား၍ ဝေးကွာနေသော်လည်း “မေတ္တာ”ဖြင့် ဆက်သွယ်လျှင် အနီးကလေးဟု ဆိုရ၏။

❖(၁၇)။မေတ္တာကို အလျားအနံ မရှိသော်လည်း၊ အသွားအပြန် ရှိသောတရား ဟုဆိုကြ၏။

❖(၁၈)။စောင်ခြုံ၍ မလုံနိုင်၊မေတ္တာခြုံမှ လုံနိုင်၏။

❖(၁၉)။ငွေဖြင့် ဆက်ဆံရုံနှင့် မမြဲ၊မေတ္တာဖြင့် ဆက်ဆံမှ တစ်သက်ပန် မြဲနိုင်၏။

❖(၂၀)။စက်၊ဗုံး၊အမြောက်မက ထက်မြက်ထိရောက်ပြီး၊တစ်သက်လုံး အောက်ကျနိုင်သော လက်နက်မှာ
“သည်းခံခြင်း” ဆိုသော မေတ္တာလက်နက်ပင်ဖြစ်လေသည်။

❖(၂၁)။မေတ္တာစွမ်းရည်ကြောင့် ဆန့်ကျင်ဘက်ပြုသူတို့အပေါ်အနိုင်ရရှိပုံကို “သာမာဝတီမိဖုရား၊ဥတ္တရာ အမျိုးသမီးနှင့်မာဃလုလင်” တို့ကို သာဓက အဖြစ် ကြည့်သင့်၏။

❖(၂၂)။အိုးအလုံး ၁၀၀ဖြင့် တစ်နေ့လျှင်သုံးကြိမ်ချက်၍လှူဒါန်းသော ဒါနထက် နို့တစ်ညှစ်စာ တစ်ခဏတာမျှပွါးများသော မေတ္တာဘာဝနာက ပို၍အကျိုး
ကြီးမားကြောင်းမြတ်စွာဘုရားကဟောကြားထားလေသည်။

“မေတ္တာသုတ်အမွှန်း ဧကပိုဒ်ရတု”
•••••••••••••••••••••••••••••••••••••••••••••••
သုံးလူ့ထွတ်တင်၊မြတ်ရှင်ပင်၏၊
သွန်သင်ဟောကြား၊မြတ်တရားကို
နာကြားပြီးကာ၊ထေရ်ငါးရာတို့
မဟာမြိုင်တွင်း၊ဝင်ကာချဉ်းလျက်၊မယွင်းနေ့ည၊
မြတ်ဓမ္မကို ကျနသေချာ၊အားထုတ်ကာဖြင့်၊
သီလတန်ခိုး၊အရှိန်မိုး၍၊ရုက္ခစိုးနတ်၊ဗိမာန်ရပ်မှ၊
မပြတ်စွန့်ခွါ၊မခံသာကား၊ကြံရာမရ၊ခြောက်လှန့်ကြသော်၊
သပ္ပါယကင်း၊ထိုဝါတွင်းဝယ်၊ရှင်ရင်းထံပါး၊
ဝင်ခစားစဉ်၊ဘုရားမြတ်စွာ၊တို့ဆရာက၊
မေတ္တာမည်ခေါ်၊ပရိတ်တော်ကို၊အဖော်ပြုကာ၊
တောဝနာသို့၊ဆောစွာမသွေ၊သွားရောက်စေလျှင်၊
ထွေထွေဘယာ၊ကင်းစင်ကွာလျက်၊
ဒေဝါအများ၊ မေတ္တာထား၍၊မအားနေ့ည၊
အားထုတ်ကြသဖြင့်၊အာသဝကုန်ခန်း၊
ရဟန္တာစစ်၊အမှန်ဖြစ်သည့်၊မေတ္တသုတ္တန်၊
ဓမ္မက္ခန်ကို၊သံပြိုင်ကြေညာ၊ရွတ်ချိန်သာပြီ၊
သေချာမောင်တို့ ရွတ်ပါစို့။
(သေချာမယ်တို့ ရွတ်ပါစို့။)
[အထူးပရိတ်ကြီးမှ ဖော်ပြပါသည်။]
-【စာရိုက်ပူဇော်သူ - Admin Team ofYoung Buddhist Association】
-【အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ၊ မဟာသဒ္ဓမ္မဇောတိကဓဇ ဘဒ္ဒန္တပညာသာမိ(မာဂဓီ-သာစည်) ဆရာတော်ဘုရားကြီး၏ “အခါတော်နေ့များမှ”-】
Posted by►
 

No comments:

Post a Comment

Related Posts Plugin for WordPress, Blogger...