စကြာဝဠာအနန္ဒ၌ရှိကြကုန်သော လူ၊နတ်၊ဗြမ္မာ၊သတ္တဝါအားလုံးတိုသည် ကိုယ်စိတ်နှစ်ဖြှာချမ်းသာကြပါစေ၊ကောင်းကျိုးလိုရာစန္ဒ ပြည်ဝကြပါစေ...







သွေးတိုးရောဂါ (Hypertension)


 

သွေးတိုးရောဂါ ဆိုတာကတော့ အသံတိတ် လူသတ်လက်နက်အဖြစ် ထင်ရှားလာပါတယ်။ အသက်ကြီး သူများသာမက လူနေမှုပုံစံ ပြောင်းလဲလာတာကြောင့် အသက်ငယ်ရွယ်သူတွေမှာပါ သွေးတိုး ရောဂါ ဖြစ်နေကြပါတယ်။
သွေးတိုးရောဂါဟာ လေဖြတ်ခြင်းနဲ့ နှလုံးကြွက်သားပုပ်ခြင်းတို့ရဲ့ အဓိက အကြောင်းရင်းဖြစ်ပါတယ်။ သွေးပေါင်ချိန် တိုင်းတဲ့အခါမှာ နှစ်မျိုးထွက်ပါတယ်။

အပေါ်သွေးနဲ့ အောက်သွေးပါ။ အပေါ်သွေး ကတော့ နှလုံး ညှစ်လိုက်တဲ့ အချိန်မှာ သွေးကြောပေါ်ကို ကျရောက်တဲ့ ဖိအားဖြစ်ပြီး အောက်သွေးဆိုတာကတော့ နှလုံးနား လိုက်တဲ့အချိန်မှာ သွေးကြောတွေအပေါ်မှာ ကျရောက်တဲ့ ဖိအားဖြစ်ပါတယ်။ ဥပမာ အပေါ်သွေး ၁၂၀ အောက်သွေး ၈၀ ဆိုရင် နှလုံးညှစ်လိုက်တဲ့အချိန် သွေးကြောတွေပေါ်သက်ရောက်တဲ့အားက ၁၂၀ဖြစ်ပြီး နှလုံးနားနေတဲ့အချိန်မှာ သွေးကြောအပေါ်သက်ရောက်တဲ့အားက ၈၀ ဖြစ်ပါတယ်။ Unit ကတော့ mmHg (millimeter mercury) ဖြစ်ပါတယ်။ သွေးတိုးတယ်ဆိုတာကတော့ အဲဒီ သွေးကြောတွေ ပေါ် ကျရောက်တဲ့ ဖိအားတွေ သာမန်ထက်များနေတာပဲဖြစ်ပါတယ်။

ပုံမှန်သွေးပေါင်ချိန်
အကောင်းဆုံး သွေးပေါင်ချိန်ကတော့ အပေါ်သွေး ၁၂၀အောက်နဲ့ အောက်သွေး ၇၅အောက်ဖြစ်ပါတယ်။ ဒါပေမယ့် အကြမ်းအားဖြင့် အပေါ်သွေး ၁၀၀ နဲ့ ၁၄၀ကြား အောက်သွေး ၆၀ နဲ့ ၉၀ ကြားကို ပုံမှန်သွေးပေါင်ချိန် လို့ ခေါ်ဆိုနိုင်ပါတယ်။
ဘယ်လိုလူတွေ ကုသမှုလိုအပ်နေပြီလဲ။

ဘယ်အချိန်တိုင်းတိုင်း သွေးပေါင်ချိန် ၁၄၀/၉၀ အထက်ဖြစ်နေပြီ ဆိုရင်တော့ ဒီလူဟာ သွေးတိုးရောဂါရှိနေပြီလို့ ဆိုနိုင်ပါတယ်။ သွေးတိုးရောဂါရှိပြီဆိုပေမယ့်လည်း ချက်ခြင်းကြီး ကုသမှုခံယူစရာမလိုသေးပါဘူး။ (ဒီနေရာမှာ စာအုပ်တစ်ခုနဲ့ တစ်ခု အနည်းငယ်လွဲနိုင်ပါတယ်။)
၁၄၀/၉၀ ၀န်းကျင်ဟာ အပျော့စားသွေးတိုးလို့ခေါ်ပြီး ဒီအခြေအနေမှာ ဆေးဝါးထက်စာရင် နေထိုင် စားသောက် မှု ပုံစံပြောင်းခြင်း ဥပမာ လေ့ကျင့်ခန်းလုပ်ခြင်း၊ အသီးအရွက်စားခြင်း တို့နဲ့ထိန်းသိမ်းတာက ပိုပြီး အဆင်ပြေ တယ်လို့ဆိုပါတယ်။ ဒါပေမယ့် သွေးပေါင်ချိန် ၁၆၀/၁၀၀ အထက်ရှိနေတဲ့သူတွေ ဒါမှမဟုတ် သွေးပေါင်ချိန် ၁၄၀/၉၀ နဲ့ ဆီးချိုရောဂါ၊ ကျောက်ကပ်ရောဂါ တစ်မျိုးမျိုးတွဲနေပြီဆိုရင်တော့ ဆေးဝါးတွေနဲ့ ကုသမှု ခံယူ ရပါတော့မယ်။ ဒီထဲမှာမှ သွေးပေါင်ချိန် အပေါ်သွေး ၁၈၀ကျော် ဒါမှမဟုတ် အောက်သွေး ၁၁၀ကျော်နေရင်တော့ အရေးပေါ်သွေးတိုးရောဂါ (Hypertensive Crisis) လို့ခေါ်ပြီး ကုသမှုမဖြစ်မနေ ခံယူရပါလိမ့်မယ်။

ဘာ့ကြောင့် သွေးတိုးရောဂါဖြစ်တာလဲ။
သွေးတိုးရောဂါကို အဓိကအားဖြင့်တော့ နှစ်မျိုးခွဲခြားပါတယ်။ Primary Hypertension and Secondary Hypertension ဆိုပြီးတော့ပါ။ Primary Hypertension ဟာ သွေးတိုးရောဂါရှိသူစုစုပေါင်းရဲ့ ၉၅ရာခိုင်နှုန်း လောက်မှာဖြစ်ပါတယ်။ ကံဆိုးစွာနဲ့ပဲ Primary Hypertension ဘာ့ကြောင့်ဖြစ်ရတာလဲဆိုတာကို အခုချိန်ထိ လူတွေနားမလည်နိုင်ကြသေးပါဘူး။ ဒီလိုမျိုးဘာ့ကြောင့်ဖြစ်ရတာလဲဆိုတဲ့အကြောင်းရင်းကို နားမလည်ခြင်းက သွေးတိုးရောဂါကို အမြစ်ပြတ်ပျောက်ကင်းစေသော ရောဂါမျိုးမဟုတ်ဘဲ သွေးပေါင်ချိန်ပုံမှန်ဖြစ်နေအောင် ထိန်းထားလို့ပဲရတဲ့ ရောဂါတစ်မျိုးဖြစ်နေစေပါတယ်။ ကျန်တဲ့ သွေးတိုးရောဂါရှင် ၅ရာခိုင်နှုန်းကတော့ Secondary Hypertension လို့ခေါ်တဲ့ နှလုံး၊ ကျောက်ကပ်၊ ဟော်မုန်း တစ်မျိုးမျိုး မူမမှန်ခြင်းကြောင့် ဖြစ်ရတာပါ။ Primary Hypertension နဲ့ကွာတဲ့အချက်ကတော့ အဲလိုမူမမှန်တဲ့ နှလုံး၊ ကျောက်ကပ်၊ ဟော်မုန်းရောဂါတွေကို ပုံမှန်ပြန်ဖြစ်အောင် ကုသနိုင်ပြီဆိုရင် သွေးတိုးရောဂါပါ ပျောက်သွားတာဖြစ်ပါတယ်။

သွေးတိုးရင် ဘာလက္ခဏာတွေပြမလဲ။
သွေးတိုးရောဂါဟာ လက္ခဏာမည်မည်ရရ မပြတတ်ပါဘူး။ ဒီလိုလက္ခဏာမည်မည်ရရ မပြတတ်ခြင်းကိုက သွေးတိုးရောဂါကို ကြောက်ဖို့ကောင်းစေပါတယ်။ ညတုန်းကအိပ်တာအကောင်းပဲ မနက်ကျတော့ လေဖြတ်ပြီး သေနေပြီ၊ ဦးနှောက်သွေးကြောပြတ်သွားပြီ အစရှိတာတွေဟာ သွေးတိုးရောဂါရဲ့ အသံတိတ် လူသတ်တတ်တဲ့ ပုံစံကိုပြနေတာဖြစ်ပါတယ်။ ခေါင်းကိုက်ခြင်း၊ ခေါင်းမူးခြင်း၊ နားထဲကလေထွက်ခြင်း၊ မူးခနဲ မိုက်ခနဲ ဖြစ်သွားခြင်း တို့တွေက သွေးတိုးနေရင်ပြတတ်တဲ့လက္ခဏာတွေဖြစ်ပါတယ်။ ဒါပေမယ့် လူတိုင်းမှာဖြစ်မနေတတ်ပါဘူး။ တချို့တွေဆိုရင် သွေးပေါင်ချိန် ၂၀၀နားနီးနေတဲ့အချိန်မှာတောင် ခေါင်းမူး ခေါင်းကိုက် ဘာလက္ခဏာမှမပြဘဲ ရှိနေတတ်ပါတယ်။ ဒါ့ကြောင့် သွေးပေါင်ချိန်ကို ပုံမှန်ချိန်ပေးခြင်းကသာလျှင် သွေးတိုးရောဂါရှိမရှိကို အကောင်းဆုံး သိရှိနိုင်ပါလိမ့်မယ်။

သွေးတိုးရောဂါကုသခြင်း။
ကုသတယ်ဆိုတာထက်စာရင် Management (စီမံခန့်ခွဲခြင်း) ဆိုတဲ့စကားလုံးသုံးရမှာဖြစ်ပါတယ်။ သွေးတိုး ရောဂါကိုကုသတဲ့အခါမှာ Life style modification (လူနေစားသောက်မှုဓလေ့များ ပြောင်းလဲခြင်း) နဲ့ Medication (ဆေးဝါးများဖြင့်ကုသခြင်း) နှစ်မျိုးလုံးနဲ့ ကုသရပါတယ်။ အများအားဖြင့်တော့ မြန်မာနိုင်ငံ က လူအများစု သွေးတိုးရောဂါကိုကုသရာမှာ ဆေးဝါးများကို အားကိုးတာများပြီး နေထိုင်စားသောက်မှုပုံစံကိုတော့ ပြောင်းလဲမှုမရှိခြင်းက သွေးတိုးရောဂါကို မသက်သာပဲရှိစေပါတယ်။

နေထိုင်မှုပုံစံပြောင်းလဲခြင်း။
အဆီလျှော့စားပါ။ ဆေးလိပ်၊ အရက် ဖြတ်ပါ။ အငန်လျှော့ပါ (အငန်ဆိုရင် အများစုပြေးမြင်မိကြတာက ငံပြာရည်နဲ့ ဆားပဲဖြစ်ပါတယ်။ ငံပြာရည်နဲ့ ဆားအပြင် နေ့စဉ်စားသုံးနေကြတဲ့ ငါးပိ၊ ငါးခြောက်၊ အခြား ဆားသိပ် ထားတဲ့အရာများ၊ အချိုမှုန့်၊ ပွအောင် ဖွထားသော အစားအစာများ ဥပမာ အီကြာကွေးပွပွကြီးများ၊ ကိတ်မုန့် ပွပွကြီးများကပါ သွေးတိုးစေပါတယ်။ နောက်ဆုံး ပဲပြုတ်ကို ပွအောင်ဖွတဲ့အခါ ဆော်ဒါသုံးရပါတယ်၊ ဂျုံတွေကို ပွနေအောင် ဆော်ဒါသုံးရပါတယ်။ အဲဒီဆော်ဒါတွေကလည်း သွေးတိုးစေပါတယ်)။ ၀နေရင် ကိုယ်အလေးချိန် လျှော့ပါ။ BMI ကို 25 ကျော်မနေအောင် ထိန်းထားပါ (BMI ကတော့ ကိုယ့်ရဲ့ ကိုယ်အလေးချိန် Kg ကို အရပ် metre နှစ်ထပ်ကိန်းနဲ့ စားရတာဖြစ်ပါတယ်။ စားလို့ရလာတဲ့ရလဒ်က ၁၈ကနေ ၂၅ကြားဆို ပုံမှန်ဖြစ်ပါတယ်။ ၂၅ကျော်ရင် အ၀လွန်နေပါပြီ)။ အသီးအရွက်နဲ့ ငါးများများစားပေးပါ။ နေ့စဉ် လေ့ကျင့်ခန်းပုံမှန်လုပ်ပါ။ လမ်းလျှောက်ပါ။

ဆေးဝါးများဖြင့် ကုသခြင်း။
သွေးတိုးရောဂါဟာ လေဖြတ်ခြင်းနဲ့ နှလုံးရောဂါကို အဓိကဖြစ်စေပါတယ်။ နှစ်ခုလုံးက သေစေနိုင်ပါတယ်။ မသေဘူးဆိုရင်တောင်မှ ဒုက္ခိတဘ၀နဲ့ နေသွားရနိုင်ပါတယ်။ ကြောက်ဖို့ကောင်းသလို ကာကွယ်လို့လည်း ရပါတယ်။ ဒါပေမယ့် မြန်မာနိုင်ငံက သွေးတိုးရောဂါရှိတဲ့ လူအတော်များများဟာ သွေးတိုးရောဂါကို ကြောက်စရာတစ်ခုအဖြစ် မမြင်နိုင်ကြဘူးဖြစ်နေတယ်။ ဆေးသောက်တဲ့အခါမှာလည်း ကိုယ့်စိတ်ထဲမှာ သွေးတိုးနေတယ်လို့ထင်တဲ့အခါမှသာ သောက်တာမျိုးတွေလုပ်တတ်ကြပြီး ပုံမှန်ဆေးကုသမှုခံယူဖို့ စိတ်မ၀င်စားတတ်ကြဘူး။

ဒါတွေဟာ မြန်မာနိုင်ငံမှာ လေဖြတ်ခြင်းနဲ့ နှလုံးကြွက်သားပုပ်ခြင်းကြောင့် သေဆုံးရတဲ့သူတွေ၊ ဒုက္ခိတဖြစ်ရတဲ့သူတွေ များပြားရခြင်းရဲ့ အဓိကအကြောင်းရင်းပဲဖြစ်ပါတယ်။
သွေးတိုးရောဂါ ဟာ လုံးဝအမြစ်ပြတ်အောင် ကုသလို့ရတဲ့ရောဂါတစ်မျိုးမဟုတ်တာကြောင့် ပုံမှန် ဆေးကုသမူ ခံယူပြီး သွေးပေါင်ချိန် ကို ထိန်းထားဖို့လိုအပ်ပါတယ်။ နေ့စဉ်ပုံမှန် ဆေးသောက်သုံးပြီး သွေးပေါင်ချိန် ထိန်းထားဖို့လို ပါတယ်။ အသစ်အသစ်ထွက်ရှိလာတဲ့ သွေးတိုးကျဆေးတွေ အမျိုးမျိုးရှိပေမယ့်လည်း သွေးကျဆေးအနေနဲ့ အသက်အရွယ်၊ သွေးတိုးရောဂါအခြေအနေ၊ အခြားတွဲဖြစ်နေတဲ့ရောဂါ အစရှိတဲ့ အချက်အလက်တွေ ပေါ်မူတည်ပြီး ဆေးဝါးရွေးချယ်ရတာဖြစ်တဲ့အတွက် ဆေးဝါးနဲ့ကုထုံးတွေကို ခံယူတော့မယ် ဆိုရင်တော့ မိမိဘာသာ စိတ်ကြိုက်ဆေးလျှောက်သောက်တာထက်စာရင် ကျွမ်းကျင်တဲ့ကျန်းမာရေးပညာရှင်နဲ့ တိုင်ပင်ပြီးမှ သောက်သုံးတာက အန္တရာယ်ကင်းပြီး အကောင်းဆုံးဖြစ်နိုင်ပါလိမ့်မယ်။

http://academicmedicines.blogspot.jp/ မှ ထုတ်နုတ်တင်ပြထားပါသည်။

MOMO Pharmacy Myanmar,
အာရောဂျံ ဆေးခန်း၊
အမှတ် (၁၆) ဗဟိုလမ်း၊
(၁၃) ရပ်ကွက်၊ သီရိမြိုင် ဘူတာရှေ့၊
ရန်ကုန်။
Mobile : 09-4310-4163 & 09-3023-7389

သွေးတိုးရောဂါ (Hypertension).

No comments:

Post a Comment

Related Posts Plugin for WordPress, Blogger...