သံဃာပြစ်မှားသူတို့နိဂုံး (၁)
၁။
မြတ်စွားဘုရားပွင့်တော်မူလာရသည့်အဓိကအကြောင်းရင်းကအားလုံးသောသတ္တ၀ါတွေအတွက်သံသရာဝဋ်ဆင်းရဲကနေကင်းလွတ်စေဖို့ဖြစ်ပါတယ်။လောကသားအားလုံးရဲ့အကျိုးအတွက်၊လောကကိုအလင်းရောင်ပေးဖို့အတွက်ပွင့်တော်မူလာရခြင်းဖြစ်ပါတယ်။သူဘုရားဖြစ်ဖို့အတွက်(သူ့အတ္တအတွက်)ပွင့်တော်မူလာတာမဟုတ်ပါဘူး။သူ့အတွက်ဆိုရင်…..လွန်ခဲ့သောလေးသင်္ချေနှင့်ကမ္ဘာတစ်သိန်းအလွန်ကသုမေဓာရှင်ရသေ့ဘ၀နဲ့ဒ
ီပင်္ကရာမြတ်ဘုရားခြေတော်ရင်းမှာပဲသံသရာဝဋ်ဒုက္ခသမုဒ္ဒရာကြီးထဲကနေအပြီးအပိုင်ထွက်ခွာသွားနိုင်တဲ့ပါရမီတော်အပြည့်အ၀ရှိပြီးသားပါ။ဒါပေမဲ့မီးပင်လယ်ဝိုင်းနေတဲ့လောကသားတွေရဲ့ဒုက္ခတွေကိုကြည့်ပြီးတော့…….”ဗုဒ္ဓေါ ဗောဓေယျံ၊ မုတ္တော မောဓေယျံ၊ တိဏ္ဏော တာရေယျံ”- “ငါသစ္စာလေးပါးသိသလိုလောကသားတွေလည်းသိစေရမယ်”၊”ငါဘ၀အနှောင်အဖွဲ့ကနေလွတ်မြောက်သလိုသူတို့လည်းလွတ်မြောက်စေရမယ်”၊”ငါသံသရာဝဲသြဃကကူးမြောက်နိုင်သလိုလောကသားတွေလည်းကူးမြောက်စေရမယ်”လို့စိတ်ပိုင်းဖြတ်ပြီးနိဗ္ဗာန်ချမ်းသာကြီးကိုစွန့်လွှတ်တော်မူခဲ့တာပါ။အဲ့ဒီဘ၀ကစလို့ဝေဿန္တရာမင်းဘ၀တိုင်အောင်လောကသားတွေအတွက်”လေးသင်္ချေနှင့်ကမ္ဘာတစ်သိန်း”ပါရမီတော်တွေဖြည့်ကျင့်ခဲ့ရတာပါ။
၂။
မဟာသက္ကရာဇ်၆၈ခုနှစ်၊ကဆုန်လပြည့်နေ့မှာလောကအကျိုးကိုဆောင်ရွက်မည့်သိဒ္ဓတ္ထဆိုတဲ့သူငယ်လေးတစ်ယောက်လူ့လောကကိုရောက်ရှိလာခဲ့ပါတယ်။မဟာသက္ကရာဇ်၁၀၃ခုနှစ်၊ကဆုန်လပြည့်၊သက်တော်(၃၅)နှစ်ပြည့်နေ့မှာတော့လောကအကျိုးအတွက်မွေးဖွားလာတဲ့သိဒ္ဓတ္ထတစ်ယောက်လောကမှာအကြီးဆုံး၊အမြင့်မြတ်ဆုံး၊အသာဆုံးဖြစ်တဲ့၊အလုံးစုံသောတရားတွေကိုသိတော်မူတဲ့”ဗုဒ္ဓ”အဖြစ်ကိုရရှိတော်မူခဲ့ပါတယ်။သက်တော်(၃၅)နှစ်ပြည့်လို့အော်တိုမစ်တစ်”ဗုဒ္ဓ”အဖြစ်ရရှိခဲ့တာမဟုတ်သလို၊ဥုံဖွ…ဘုရားဖြစ်စေဆိုပြီးတော့ဘုရားဖြစ်လာရတာလည်းမဟုတ်ပါဘူး။ခြောက်နှစ်တိုင်တိုင်သီလ၊သမာဓိ၊ပညာတရားတွေကိုခက်ခက်ခဲခဲဖြည့်ကျင့်ပြီးမှဘုရားအဖြစ်ရရှိခဲ့တာပါ။လောကမှာဘုရားရတနာပေါ်ထွက်လာတာနှင့်တပြိုင်တည်းတရားရတနာလည်းပေါ်ထွက်လာခဲ့ပါတယ်။ကံကောင်းထောက်မစွာနဲ့တပုဿနှင့်ဘလ္လိကကုန်သည်နှစ်ယောက်ဟာသာသနာတော်မှာရတနာနှစ်ပါးကိုပထမဆုံးကိုးကွယ်ဆည်းကပ်ခွင့်ရရှိခဲ့တဲ့ဥပါသကာများအဖြစ်မှတ်တမ်းတင်ခွင့်ရရှိခဲ့ကြပါတယ်။
၃။
ဘုရားဖြစ်ပြီးနောက်ဝါဆိုလပြည့်နေ့အထိနှစ်လတိုင်တိုင်လောကမှာသံဃာရတနာမပေါ်လာသေးပါဘူး။ဝါဆိုလပြည့်နေ့မှာတော့သာသနာတော်အတွက်အကြီးမားဆုံးပြောင်းလဲမှုကြီးတစ်ခုဖြစ်ပေါ်လာခဲ့ပါတယ်။ကောဏ္ဍညဦးဆောင်တဲ့သူငယ်ချင်းငါးယောက်ကိုနိဗ္ဗာန်တံခါးကြီးကိုဖွင့်ဖို့အတွက်သော့တွေဖြစ်တဲ့မဂ္ဂင်ရှစ်ပါးတရားတော်ကိုချပြလိုက်တဲ့အခါမှာကောဏ္ဍညသောတာပန်တည်ပြီး၊ဧဟိဘိက္ခုရဟန်းဖြစ်ပါတယ်။အဲ့ဒီနေ့ကစလို့အစဉ်အတိုင်းသောတာပန်ဖြစ်လာတာဝါဆိုလပြည့်ကျော်လေးရက်နေ့မှာအဿဇိရသေ့သောတာပန်ဖြစ်တာနဲ့အတူအားလုံးဧဟိဘိက္ခုရဟန်းတွေဖြစ်လာခဲ့ပါတယ်။အဲ့ဒီရက်ကစလို့လောကမှာ”သံဃာရတနာ”ပေါ်ပေါက်လာပါတော့တယ်။
ဝါဆိုလပြည့်ကျော်(၅)ရက်နေ့မှာတော့ငါးပါးလုံးရဟန္တာဖြစ်သွားကြပါတယ်။သိပ်မကြာခင်မှာပဲယသသူဋ္ဌေးသားနှင့်တကွသူငယ်ချင်း၅၄ယောက်လည်းမြတ်စွာဘုရားနဲ့တွေ့ပြီးရဟန္တာတွေဖြစ်သွားကြပါတယ်။သံဃာရတနာ၆၀ဆယ်နှင့်အတူသာသနာတော်ကြီးကိုစတင်တည်ထောင်ခဲ့တာပါ။ရဟန်းတို့…….”လူ…နတ်…ဗြာဟ္မာ…သတ္တ၀ါတို့အကျိုးစီးပွားအတွက်……ခရီးသွားကြွ…..ခရီးတစ်ကြောင်းကိုနှစ်ပါးအတူတူမသွားကြနဲ့…..လောကမှာဥာဏ်ပညာမျက်စိရှိတဲ့သတ္တ၀ါတွေအများကြီးရှိကြတယ်။သူတို့တွေဟာတရားတော်တွေကိုမနာကြားရလျှင်မဂ်၊ဖိုလ်၊နိဗ္ဗာန်တရားတွေမှဆုံးရှုံးသွားကြလိမ့်မယ်…..အစ၊အလယ်၊အဆုံးသုံးပါးလုံးပြည့်စုံတဲ့သီလ၊သမာဓိ၊ပညာတရားသုံးပါးကိုဟောကြားကြလော့”ဟုမြတ်စွာဘုရားတိုက်တွန်း၊သာသနာပြုစေလွှတ်တာနှင့်အတူသာသနာတော်ကြီးစည်ပင်လာခဲ့ပါတယ်။လေးဆယ့်ငါးဝါအချိန်ကာလရောက်လာတဲ့အခါမှာတော့သာသနာတော်ကြီးမှာ”ရဟန်း၊ရဟန်းမိန်းမ၊ဥပါသကာ၊ဥပါသိကာမ”ဆိုပြီးပုရိသတ်လေးပါးပြည့်စုံလာခဲ့ပါတယ်။
၎။
ပဉ္စ၀ဂ္ဂီငါးပါးနှင့်စတင်ခဲ့တဲ့သံဃာရတနာဟာအလွန်အင်မတန်မှသန့်ရှင်း၊စင်ကြယ်ပြီးအညစ်အကြေးကင်းပါတယ်။အရိယာသံဃာပဲဖြစ်ဖြစ်၊သမုတိသံဃာပဲဖြစ်ဖြစ်၊လူ၊နတ်၊ဗြဟ္မာ၊သတ္တ၀ါတို့ရဲ့လက်အုပ်ချီမိုးရှိခိုးခြင်းငှာထိုက်တဲ့သံဃာရတနာပဲဖြစ်ပါတယ်။သံဃာရတနာဆိုတာလယ်ယာမြေကောင်းနဲ့ဥပမာပေးခံထားရတာပါ။လယ်ယာမြေကောင်းမှာစိုက်ပျိုးလျှင်အသီးအနှံပိုမိုပြီးတော့ဖြစ်ထွန်းသလို၊သံဃာရတနာဆိုတဲ့မြေကောင်းမြေမြတ်မှာအသီးအနှံစိုက်ပျိုးလျှင်အကျိုးပိုပြီးတော့ဖြစ်ထွန်းတဲ့သံဃာရတနာပါ။သုပ္ပဋိပန္နအစဖြာတဲ့ဂုဏ်တော်ကိုးပါးနှင့်ပြည့်စုံတဲ့သံဃာရတနာဖြစ်ပါတယ်။
မြတ်စွာဘုရားပရိနိဗ္ဗာန်ပြုပြီးတဲ့နောက်မှာသာသနာတော်ကြီးကိုဦးဆောင်ခွင့်ရတဲ့သံဃာရတနာပါ။သာသနာတော်ကြီးရဲ့အသက်ဖြစ်တဲ့သံဃာရတနာပါ။လောကမှာမြတ်စွာဘုရားပွင့်တော်မူလာလို့ကုသိုလ်၊အကုသိုလ်ဆိုတာသိလာရတာပါ။သစ္စာလေးပါးတရားတွေသိခွင့်ရကြတာပါ။မြတ်စွာဘုရားရှင်မရှိတော့တဲ့နောက်ပိုင်းမှာမြတ်စွာဘုရားရှင်ဟောကြားခဲ့တဲ့တရားဓမ္မတွေမကွယ်ပျောက်ရလေအောင်နည်းအမျိုးမျိုးနဲ့ထိန်းသိမ်းစောင့်ရှောက်လာခဲ့ကြတဲ့သံဃာရတနာပါ။သံဃာရတနာရှိလို့”နမောတဿ၊ဗုဒ္ဓံသရဏံဂစ္ဆာမိ၊ဧ၀ံမေသုတံ”စတာတွေဆိုခွင့်၊နာကြားခွင့်ရနေကြတာပါ။ဒီသံဃာရတနာရှိလို့ဝိပဿနာတရားတွေအားထုတ်ခွင့်ရပြီး၊စိတ်ငြိမ်းချမ်းမှုရနေကြတာပါ။တကယ်တော့…”အရင်ကဘုရားရှိလို့သံဃာရှိခဲ့တာပါ။ခုတော့သံဃာရှိလို့ဘုရားရှိတာပါ၊တရားရှိတာပါ”။
မြတ်ဗုဒ္ဓရဲ့တရားတော်တွေဟာလုပ်ကြံပြီးဟောထားတာတွေမဟုတ်သလို၊အာဏာ၊ပါဝါပြပြီးတော့သတ်မှတ်ထားတဲ့တရားတွေလည်းမဟုတ်ပါဘူး။အရှိကိုအရှိအတိုင်းထုတ်ဖော်ထားတဲ့တရားတော်တွေပဲဖြစ်ပါတယ်။”လောကမှာ…..လူသတ်လျှင်….သူတစ်ပါးဥစ္စာခိုးလျှင်……ဒီဘ၀မှာပဲသူများသတ်တာခံရတတ်တယ်၊ကိုယ့်ပစ္စည်းပြန်ပြီးတော့အခိုးခံရတတ်တယ်။အဲ့လိုအလုပ်မခံရဘူးဆိုရင်တောင်လောကဥပဒေအတိုင်းထောင်ကျတာတို့ဘာတို့ခံရတယ်။သူများအသက်သတ်တဲ့သူကိုပတ်ဝန်းကျင်က….ဒီကောင်လူသတ်တဲ့ကောင်….ဒီကောင့်အနားမကပ်ကြနဲ့လို့ဆိုပြီးဘယ်သူမှကပ်ရဲကြမှာမဟုတ်သလို၊သူများပစ္စည်းခိုးတဲ့သူကိုလည်းကိုယ့်ပတ်ဝန်းကျင်ကဘယ်သူမှယုံကြည်ခြင်းခံရမှာမဟုတ်ပါဘူး။ဒီလိုပဲ။တမလွန်မှာလည်းအဲ့လိုဖြစ်တတ်တယ်ဆိုတာကိုဖြစ်တတ်တဲ့သဘောတွေကိုဖော်ထုတ်ထားတာပဲဖြစ်ပါတယ်”။
၅။
“သံဃောဒုဿီလောနာမနတ္ထိ””သံဃာမှာဒုဿီလမရှိပါဘူး”။ပုဂ္ဂိုလ်မှာသာဒုဿီလရှိတာပါ။ပုဂ္ဂိုလ်နဲ့သံဃာကွဲပြားဖို့လိုပါတယ်။ပုဂ္ဂိုလ်တစ်ဦးတစ်ယောက်ဟာသံဃာမမည်ပါဘူး။လေးပါး၊လေးပါးထက်ပိုလွန်မှသံဃာမည်တာပါ။သံဃာဆိုတာခုလက်ရှိသံဃာတော်တွေတွင်မကပါဘူး။အရှင်သာရိပုတ္တရာတို့၊အရှင်မဟာမောဂ္ဂလာန်တို့စတဲ့သံဃာတော်တွေလည်းပါပါတယ်။
မြတ်စွာဘုရားရှင်တည်ထောင်ခဲ့တဲ့သာသနာတော်ဟာသီလ၊သမာဓိအခြေခံတဲ့ပညာတရားနဲ့တည်ထောင်ထားတဲ့သာသနာဖြစ်တဲ့အတွက်မျက်ကန်းယုံယုံတဲ့သဒ္ဓါတရားအပေါ်မှာတည်ဆောက်ထားတာလည်းမဟုတ်ပါဘူး။လက်တွေ့ကျင့်ကြံလျှင်လက်တွေ့အကျိုးကိုတွေ့မြင်ရလိမ့်မယ်လို့လက်တွေ့ကျကျထုတ်ဖော်ပြထားတဲ့သာသနာပါ။”လာခဲ့စမ်းပါ…ဟုတ်မဟုတ်၊ကောင်းမကောင်း၊ကိုယ်ပိုင်ဥာဏ်နဲ့စဉ်းစားဆုံးဖြတ်ပြီးမှလက်ခံပါလို့အတိအလင်းဖိတ်ခေါ်ထားတဲ့သာသနာဖြစ်ပါတယ်”။အရေအတွက်များအောင်လုပ်တဲ့သာသနာမဟုတ်သလို၊ဘာပေးမယ်၊ညာပေးမယ်လို့သွေးဆောင်ဖြားယောင်းတတ်တဲ့သာသနာလည်းမဟုတ်ပါဘူး။မည်သူ့ကိုမျှငရဲနှင့်မခြိမ်းခြောက်သလိုနတ်ပြည်နှင့်ပြပြီးတော့လည်းမမြှောက်ပါဘူး။ဆုပေးဒဏ်ပေးစနစ်ကိုလည်းမကျင့်သုံးပါဘူး။
ဗုဒ္ဓ၀ါဒဟာအကြောင်း၊အကျိုး၊ကံ၊ကံ၏အကျိုးကိုယုံကြည်တဲ့ဝါဒပါ။ကိုယ်၊နှုတ်၊စိတ်သုံးပါးကိုစောင့်ထိမ်းစေတဲ့ဝါဒလည်းဖြစ်ပါတယ်။တနည်းအားဖြင့်စာနာမှု၊ညှာတာမှု၊ကရုဏာ၊၀မ်းမြောက်မှုမုဒိတာ၊တစ်ယောက်အပေါ်တစ်ယောက်မေတ္တာထားမှုစတြဲ့ဗဟ္မစိုရ်တရားတွေကိုကျင့်သုံးစေတဲ့ဝါဒလည်းဖြစ်ပါတယ်။ဟုတ်ပါတယ်။ရှင်းပါအုံးမည်။အကြောင်း၊အကျိုး၊ကံ၊ကံ၏အကျိုးကိုယုံကြည်တယ်ဆိုတာဗြဟ္မစိုရ်တရားတွေကိုကျင့်သုံးခိုင်းတာနဲ့ဆက်စပ်နေပါတယ်။သူများအသက်မသတ်နဲ့၊သတ်လျှင်ကိုယ်လည်းအသတ်ခံတတ်တယ်။သူများပစ္စည်းမခိုးနဲ့၊ခိုးလျှင်ကိုယ့်ပစ္စည်းလည်းပြန်အခိုးခံရတတ်တယ်။သူများကိုနာကျင်အောင်မလုပ်နဲ့၊လုပ်လျှင်ကိုယ်လည်းနာကျင်ရတတ်တယ်ဆိုပြီးအကြောင်းနှင့်အကျိုးကိုပြလိုက်တဲ့အတွက်၊စာနာမှု၊ညှာတာမှု၊သနားမှု၊မေတ္တာထားနိုင်မှုစတာတွေကိုလက်တွေ့ကျင့်သုံးခိုင်းလိုက်တာပါပဲ။သူတစ်ပါးမနာကျင်ရအောင်ကောင်းတဲ့ကိုယ်၊နှုတ်၊စိတ်တွေနှင့်ပြုမူလိုက်တဲ့အတွက်၊အကျိုးဆက်အနေနဲ့ကိုယ်လည်းသူ့လိုပဲမနာကျင်ရတဲ့အကျိုးရပါတယ်။ကိုယ်ကသူတစ်ပါးကိုတစ်နည်းနည်းနှင့်နာကျင်အောင်လုပ်လိုက်လျှင်အကျိုးဆက်အနေနှင့်ကိုယ်လည်းသူ့လိုပဲပြန်ပြီးတော့နာကျင်ရတတ်ပါတယ်။ဒါကိုကံ၊ကံ၏အကျိုးလို့ခေါ်ပါတယ်။
ဗုဒ္ဓဘာသာအလိုအရတော့ကိုယ်ပြုလုပ်တဲ့ကံဟာကိုယ်နဲ့ပဲတိုက်ရိုက်ပတ်သက်ပါတယ်။ဆိုလိုတာက…..ခါးတဲ့မျိုးစေ့ကိုစိုက်ပျိုးလျှင်ခါးတဲ့အသီးပဲသီးသလို၊ချိုတဲ့အသီးကိုစိုက်ပျိုးလျှင်ချိုတဲ့အသီးပဲသီးပါတယ်။ကိုယ်ကကောင်းတာလုပ်လျှင်ကောင်းတဲ့အကျိုးကိုယ်ခံစားရမယ်။ကိုယ်ကမကောင်းတာလုပ်လျှင်လည်းကိုယ်ပဲမကောင်းတဲ့အကျိုးကိုခံစားရပါတယ်။ကြားထဲကမည်သည့်ပုဂ္ဂိုလ်တစ်ဦးတစ်ယောက်ကမျှအစားဝင်ယူလို့မရပါဘူး။(အကြောင်း၊အကျိုးဖြစ်တည်တဲ့နေရာမှာဒီထက်နက်နဲတာတွေအများကြီးရှိပါသေးတယ်။)အရာရှိသားဖြစ်လို့၊သူဋ္ဌေးသားဖြစ်လို့၊တရားသူကြီးသားဖြစ်လို့ဆိုတဲ့အကြောင်းပြချက်နဲ့ကိုယ့်လုပ်ခဲ့တဲ့အပြစ်တွေကိုသူတစ်ပါးနဲ့အစားထိုးလို့မရပါဘူး။ဘုရင့်သားသမီးဖြစ်လို့လည်းအပြစ်လျော့သွားမှာမဟုတ်ပါဘူး။
၆။
ကိတ၀ါသဆိုတဲ့မင်းကြီးမှာသားတစ်ယောက်ရှိပါတယ်။မွေးကတည်းကဒီကလေးဟာ”ရေမရှိလို့သေရလိမ့်မယ်”လို့ကြိုတင်ဟောကိန်းထုတ်ခံထားရတဲ့ကလေးပါ။အဲ့ဒါကြောင့်ဘုရင်ကြီးကသူ့သားကိုအလိုလိုက်ထားပါတယ်။နန်းတော်နဲ့မြို့ရဲ့နေရာတိုင်းမှာလည်းရေမပြတ်အောင်ရေကန်တွေ၊ရေလှောင်တိုင်ကီတွေကိုအဆင်သင့်လုပ်ပေးထားပါတယ်။
တစ်နေ့တော့ဘုရင့်သားဟာသူ့နောက်တော်ပါးအခြွေအရံတွေနဲ့ဥယျာဉ်ထဲကိုသွားပါတယ်။လမ်းမှာမြို့နေလူထုက”ပစ္စေကဗုဒ္ဓါတစ်ပါး”ကိုရိုရိုသေသေရှိခိုးနေတာကိုကြည့်ပြီးတော့မနာလိုစိတ်တွေတဖွားဖွားပေါ်လာပါတယ်။
“ဒီတောင်းစားတဲ့ဦးပြည်းကတုံးကိုဒီလူတွေကအရိုသေပေးပြီး၊ဦးပြည်းကတုံးရဲ့စကားတွေကိုစူးစူးစိုက်စိုက်နားထောင်နေကြသေးတယ်”။တွေ့ကြသေးတာပေါ့ဆိုတဲ့သဘောနဲ့လူထုကိုဆက်ပြီးတော့အရိုအသေမပေးဖို့ပြောပြီးဆင်ပေါ်ကနေဆင်းလာပါတယ်။ပြီးတော့….
“ကိုယ်တော်….စားဖို့ဆွမ်းရပြီးပြီမဟုတ်လား”လို့ကြမ်းတမ်းစွာမေးပါတယ်။ပစ္စေကဗုဒ္ဓါအရှင်မြတ်ကလည်းရပြီးတဲ့အကြောင်းပြန်ပြောပါတယ်။ပြောပြီးခြင်းပဲ”အရှင်မြတ်လက်ထဲကသပိတ်ကိုလုယူပြီး….စိတ်စိတ်မွှာမွှာရိုက်ခွဲပစ်ပါတယ်”။အရှင်မြတ်ကမင်းသားကိုသနားစွာကြည့်ပြီး”ဒီမင်းသားတော့ပျက်ဆီးတော့မှာပဲ”ရေရွတ်လိုက်တဲ့အခါမှာ”ငါဟာ…ကိတ၀ါသမင်းရဲ့သားပဲ….ငါ့ကိုဒီကိုကြည့်လို့ကောဘာလုပ်နိုင်မှာလဲ”လို့ပြောလိုက်ပါတယ်။
အရှင်မြတ်လည်းကောင်းကင်ပေါ်ပျံတက်ပြီးဟိမ၀န္တာတောင်မှာရှိတဲ့နန္ဒမူလှိုင်ဂူကိုပြန်ကြွသွားပါတော့တယ်။အရှင်မြတ်ပြန်ကြွသွားတဲ့ခဏမှာပဲ၊မင်းသားကြူးလွန်ခဲ့တဲ့အကုသိုလ်ကတမ်းအကျိုးပေးကာမင်းသားရဲ့တစ်ကိုယ်လုံးကိုလောင်ပါတော့တယ်။”ပူတယ်….ပူတယ်…..လို့အော်ပြီးအဲ့ဒီနေရာမှာပဲလဲကျသွားတယ်”။မင်းသားရဲ့အကုသိုလ်တွေကြောင့်ပဲအနားမှာရှိတဲ့ရေကန်တွေထဲကရေအားလုံးခမ်းခြောက်ကုန်ပါတော့တယ်။အသက်ကုန်တဲ့အခါမှာအ၀ီစိကိုရောက်သွားပါတယ်။ငရဲမှာနှစ်ပေါင်းများစွာခံရပြီးတဲ့အခါမှာတော့ပြိတ္တာဘုံဘ၀ကိုရောက်ပြီးဆင်းရဲဒုက္ခများစွာခံစားရပါတယ်။
********************************************************
ကျမ်းကိုး............
ဗုဒ္ဓ၀ံသပါဠိ၊အဋ္ဌကထာ
အဋ္ဌသာလိနီအဋ္ဌကထာ
ဝိနည်းမဟာဝါပါဠိ
ဥပရိပဏ္ဏာသအဋ္ဌကထာ
သဂါထာဝဂ္ဂပါဠိ
ဇာတကဋ္ဌကထာ
ပေတ၀တ္ထုအဋ္ဌကထာ
***********************************************
သာကီဝင်
Kandy, Sri Lanka
_________________________________________________
Sri Sumangala Sami ၏ စာမျက်နှာမှ ကူးယူဖော်ပြပါသည်။
(ဗဟုသုတ ဟင်းပေါင်းအိုးကြီး)
No comments:
Post a Comment