ချစ်ပြုံးစီခြယ်ခဲ့တဲ့ စိုးလွင်လွင်

 
 ညီညီစံ
နံနက်ခင်းတခုမှာ ရောင်းရင်းကြီး တေးရေး ညီညီသွင် ကျနော့်ထံ ဖုန်းဆက်လာပါတယ်။ ပိုပိုကြီး (စိုးလွင်လွင်) အမှတ်တရ Show ပွဲတခု မဖြူ (စိုးလွင်လွင်ဇနီး) စီစဉ်မှာမို့ တိုင်ပင်ဖို့ အတွက် ကျနော့်ကို ဆုံဖို့ ချိန်းဆိုခြင်း ဖြစ်ပါ တယ်။ ညီညီသွင် ပြောမှပဲ စိုးလွင်လွင် ကွယ်လွန်ခဲ့တာ ဆယ်စုနှစ် နီးပါး ကျော်လွန်သွားခဲ့ပြီ ဖြစ်ကြောင်း ကျနော် သတိထားမိ ပါတော့တယ်။ စိတ်ထဲမှာတော့ မနေ့ တနေ့ကလိုပါပဲ။ စိုးလွင်လွင်နဲ့ ပတ်သက်တဲ့ အမှတ်တရ အပိုင်းအစ တွေဟာလည်း ကျနော့်အတွေးထဲ အစီအရီ ပေါ်လာပါတော့တယ်။

စိုးလွင်လွင်ကို ညီညီသွင်နဲ့ ပတ်သက်ပြီး ရင်နှီး ကျွမ်းဝင်ခဲ့ရ ပေမယ့် သူ့ရဲ့အဆိုတော် တယောက်လို ဟိတ်ဟန် မရှိတဲ့ အနေအထိုင် ရိုးစင်းမှုတွေကြောင့် အချိန်တိုလေး အတွင်းမှာပဲ ငယ်ပေါင်းကြီးဖော် တွေလို ဖြစ်သွားခဲ့ရပါတယ်။ ကိုယ်ပိုင်သံစဉ် ရေစီးကြောင်း စတင်ကတည်းက တစိုက်မတ်မတ် မယိမ်းမယိုင် ပါဝင်လာတဲ့ စိုးလွင်လွင်ဟာ ကျနော်နဲ့ တွေ့ချိန်မှာ အောင်မြင်မှု အတော်ရနေပါပြီ။

အနုပညာကို အလေးအနက် တန်ဖိုးထားတတ်သလို အနုပညာသမား ပီသစွာ နေထိုင်ကျင့်ကြံသူတွေ ထဲမှာ စိုးလွင်လွင်ကို ချန်ထားလို့ မရပါဘူး။ ရန်ကင်းက သူ့တိုက်ခန်းလေးမှာ ကျနော်နဲ့ ညီညီသွင်ကို အခန်းတခန်း သီးသန့် ပေးထားပြီး သီချင်းတွေ စိတ်ကြိုက် ဖန်တီးခွင့် ပေးတာကို ကြည့်ခြင်း အားဖြင့် လွတ်လပ်တဲ့ အနုပညာ ဖန်တီးမှုကို ခုံမင်သူ တဦးလည်း ဖြစ်ပါတယ်။ ဂီတ အနုပညာကို တန်ဖိုးထားတဲ့ စိတ်၊ ဂီတအနုပညာ သမားတွေကို ယုံကြည် လေးစားတတ်တဲ့ စိတ်ကိုလည်း သူနဲ့ ရင်းနှီးပြီး မကြာခင်မှာပဲ ကျနော် သိရှိခွင့် ရခဲ့ပါတယ်။

၁၉၈၈ အရေးအခင်းပြီး ကာလတခုက ဖြစ်ပါတယ်။ သူ့ရဲ့ (မာနမျက်နှာ) တေးစီးရီးထွက်ပြီး ကျနော်နဲ့ ညီညီသွင် သူ့တိုက်ခန်းလေးမှာ သောင်တင် နေချိန်ပေါ့။ တရက်မှာ စိုးလွင်လွင်ဆီကို အလယ်ပိုင်းတိုင်း စစ်ဌာနချုပ်က တာဝန်ရှိသူ တချို့ ရောက်လာပြီး မန္တလေးနန်းတွင်းမှာလပြုလုပ်မယ့် Show တခု အတွက် ဖျော်ဖြေပေးဖို့ လာရောက် ဆက်သွယ်ပါ တယ်။ (အဲဒီတုန်းက တိုင်းမှူး ဗိုလ်ချုပ် ထွန်းကြည် တာဝန်ယူချိန်ပါ။)

စိုးလွင်လွင်က တာဝန်ရှိသူတွေ ပြောဆိုဆွေးနွေးတာကို အားလုံးနားထောင်ပြီး တခွန်းပဲ ပြန်မေးပါတယ်။ “ဘယ် Band ဖျော် ဖြေရမှာလဲ။ Band အဆင်မပြေရင် ကျနော် မဆိုဘူး” တာဝန်ရှိပုဂ္ဂိုလ်က စိုးရိမ်တဲ့မျက်နှာ နဲ့ “Symphony Band နဲ့ပါ” လို့ပြော လိုက်တော့ စိုးလွင်လွင်မျက်နှာ ဝင်းလက် သွားပြီး “ဒါ ဆရာဘွဲ့ Band ပဲ၊ ကျနော်ဆိုမယ်” လို့ ချက်ချင်း အဖြေ ပေးလိုက်ပါတယ်။
သူ ချစ်ခင်လေးစား ယုံကြည်ရတဲ့ ဆရာ စောဘွဲ့မှူး ဦးစီးတဲ့ Band နဲ့မို့ ဖျော်ဖြေဖို့ လက်ခံလိုက်ခြင်း ဖြစ်ကြောင်း ကျနော် သဘောပေါက် နားလည်ခဲ့ရပါတယ်။ ဆရာ စောဘွဲ့မှူးက Iron Cross Band မထူထောင်ခင် Symphony Band ကိုအရင်ဖွဲ့ခဲ့ပါတယ်။

ဖြစ်ချင်တော့ ဒီ Show ပွဲကို စိုးလွင်လွင်က “ညီစံ အတွေ့အကြုံ ရအောင် လိုက်ခဲ့ပါကွာ” ဆိုပြီး အတင်းခေါ် တာကြောင့် သူနဲ့အတူ မန္တလေးကို အမြန်ရထားကြီးနဲ့ ချီတက်ခဲ့ကြပါတယ်။ အထူးတန်း သီးသန့်တွဲပေါ်မှာ  Symphony အဖွဲ့သားတွေနဲ့ အတူတူ တပျော်တပါး ကျနော်တို့ ခရီးထွက်ခဲ့တာ အခုထိ သတိရနေပါသေးတယ်။
ကျနော်တို့ မျက်နှာချင်းဆိုင်မှာ Bass ကိုခင်မောင်သန့် (ယခု Iron Cross Band) တို့ ကြင်စဦး ဇနီးမောင်နှံ ပါ။ ကိုခင်မောင်သန့်က တလမ်းလုံး ရယ်စရာတွေ ပြောလိုက်၊ ဆရာဘွဲ့က ဟာသတွေ လုပ်လိုက်နဲ့ မန္တလေး ခရီးစဉ်ဟာ ပျော်စရာ ကောင်းလှပါတယ်။

မန္တလေး ရောက်တော့ နန်းတွင်း တပ်ထဲက တည်းခိုဆောင်တွေမှာ ဖျော်ဖြေရေး အဖွဲ့သားတွေကို နေရာချထား ပေးပါတယ်။ ကျနော်တို့ နှစ်ယောက်နဲ့ အတူ နှစ်ထပ် တည်းခိုဆောင်ရဲ့ အပေါ်ထပ်မှာ တခန်းတည်း အတူနေရာကျသူ က အဆိုတော်ကြီး ကိုခိုင်ထူးပါ။
ကိုခိုင်ထူးကို ကျနော် အဲဒီတော့မှ စတင်ရင်းနှီးဖူးတာပါ။ စိုးလွင်လွင်က ကိုခိုင်ထူးကို “ဒါ မာနမျက်နှာသီချင်းရေးတဲ့ ကျနော့် တေးရေးဆရာ ညီညီစံ” ဆိုပြီး မိတ်ဆက်ပေးပါတယ်။ ကိုခိုင်ထူးမှ မဟုတ်ပါဘူး။ ကျနော် မသိသေးတဲ့ ဂီတသမားတွေ အားလုံးကိုလည်း သူ့တေးရေးဆရာပါ ဆိုပြီး ဂရုတစိုက် မိတ်ဆက်ပေးပါတယ်။ တေးရေးသမားတွေ အပေါ် အလေးအနက် တန်ဖိုးထားတတ်တဲ့ စိုးလွင်လွင်ရဲ့ စိတ်ဓာတ်ပါ။

ညဘက် ဖျော်ဖြေရေး စင်မြင့်ရှိရာ ကျုံးမြို့ရိုးဘက်သွားတော့ ကျနော်က သူသီဆိုမယ့် Notes စာရွက်လေးတွေ ကူညီသယ်ကိုင် ပေးမယ် လုပ်တော့လည်း သူက “ညီစံ၊ ခင်ဗျားက တေးရေးဆရာပဲ၊ ကျနော့် Notes စာရွက်တွေ မကိုင်ပေး ပါနဲ့၊ ကျနော့်ဘာသာ သယ်ပါ့မယ်” ဆိုပြီး သူ့ဘာသာသူ ချိုင်းကြားညှပ်လို့ စင်ပေါ်တက် သွားတဲ့ သူပါ။

တည်းခိုဆောင်မှာ ကျယ်ကျယ်ဝန်းဝန်းနဲ့ အခန်းထဲမှာ ခုတင်သုံးလုံးနဲ့ အဆင်ပြေလှ ပေမယ့် ရေချိုးခန်း၊ အိမ်သာ ကတော့ တခန်းတည်း ရှိပါတယ်။ အပြင်ထွက်ဖို့နဲ့ စင်မြင့်ပေါ်သွားခါနီး ရေချိုးခန်း ဝင်ချိန်တိုင်းမှာ စိုးလွင်လွင်က ကိုခိုင်ထူးကို “ကိုခိုင်ထူး အရင်လုပ်ပါ ကျနော် တို့က အရေးမကြီး” ဆိုပြီးအမြဲဦးစား ပေးတတ်ပါတယ်။

ကိုယ့်ထက် စီနီယာကျတဲ့ ကိုခိုင်ထူးရဲ့ ဂီတအတွေ့အကြုံ ပြောစကားတွေကိုလည်း တလေးတစားနဲ့ နာယူတတ် ပါတယ်။ ဂီတသမားတွေ အပေါ်မှာ အမြဲလေးလေးစားစား ဆက်ဆံတတ်တဲ့ စိုးလွင်လွင်ရဲ့ စိတ်ရင်း စေတနာကို ကျနော် အဲဒီကတည်းက အနီးကပ် အကဲခတ်ခွင့် ရခဲ့ပါတယ်။
သီချင်းတွေ ပေါ်မှာ အလေးအနက် ထားတဲ့ အနုပညာ ခံစားချက်ကိုလည်း ကျနော် ကိုယ်တွေ့ ကြုံသိခဲ့ရပါတယ်။ “မာနမျက်နှာ” တေးစီးရီး ထွက်ပြီး “ချစ်တဲ့ငြိမ်း”၊ “မောင့်မျက်ရည်ဝိုင်း” အစရှိသဖြင့် စိုးလွင်လွင်ရဲ့ အောင်မြင်တဲ့ တေးစီးရီးတွေ ဆက်တိုက် ထွက်ရှိခဲ့ပါတယ်။

စိုးလွင်လွင် တေးစီးရီးတွေဟာ တကိုယ်တော် တေးစီးရီးတွေချည်းပါ။ အတွဲခွေ တခါမှ မဆိုဖူးပါဘူး။ တရက်မှာတော့ သရဖီ တေးသံသွင်းက စီစဉ်သူ ကိုကြည်သိန်းက အဆိုတော်ကြီး ကိုခိုင်ထူးနဲ့ စိုးလွင်လွင်ကို တခြမ်းစီ အတွဲခွေလုပ်ဖို့ စီစဉ်လာပါတယ်။ စိုးလွင်လွင်ကလည်း သူလေးစား ချစ်ခင်တဲ့ ကိုခိုင်ထူးနဲ့ အမှတ်တရ အတွဲခွေ လုပ်ရမှာမို့ စိတ်ဝင်တစားနဲ့ သီချင်းတွေကို ဂရုတစိုက် ပြင်ဆင်ပါတယ်။
ကျနော့်ကို သီချင်းအသစ် တပုဒ် ရေးပေးဖို့ သူကိုယ်တိုင်အပ်တဲ့ အချိန်မှာလည်း “ညီစံ၊ သီချင်းကို ဂရုစိုက်ပါ။ ကိုခိုင်ထူးလို သမ္ဘာကြီးနဲ့ တွဲရမှာမို့” ဆိုပြီး ပြောပါတယ်။ သူ့အတွက် “ပန်းရနံ့လေးမှ တပါး” ဆိုတဲ့ သီချင်းတပုဒ်ကို တေးစီးရီးအတွက် ကျနော်ရေးစပ်ပေးခဲ့ပါတယ်။ “ထားရစ်ခဲ့ နေခဲ့တော့မယ်” အမည်ရ အဲဒီ တေးစီးရီးဟာ ကိုခိုင်ထူးနဲ့ စိုးလွင်လွင် တခြမ်းစီ သီဆိုထားတာပါ။ တေးစီးရီးမှာပါဝင်တဲ့ “ချစ်ပြုံးစီခြယ်” ဆိုတဲ့ သီချင်းလေးကတော့ သူ ရေးဖွဲ့ခဲ့ သမျှ သီချင်းတွေထဲမှာ ကျနော်အကြိုက် ဆုံး တေးသီချင်းပါပဲ။

ချစ်ပြုံးစီခြယ်

V1:       စန်းသော်တာ လမင်းကြီးလို  ဝင်းဝင်းပပထည်
တို့ချစ်သူ ရွှေစင်လေး ရှုမငြီးနိုင်တယ်
မောင့်ရင်ကိုအေးချမ်းစေသူ      ပြုံးပန်းအလှမျက်ခြယ်
သက်နွဲ့တင် ချိုအီမူး ကျော့ဆုံးကေသွယ်

V2:       မရမ်းရောင်ခြယ် သူ့နှုတ်ခမ်းလေးရယ် … နမ်း နမ်း နမ်းချင်စဖွယ်
ပန်းဝတ်ရည်တုံအိမူး ကိုယ်ရူးပြီကွယ်            … နန်းစံသူ မြမျက်ဝန်းရယ် အသည်းစွဲ
နုတ်ထားတယ်
စိမ်းနဲ့နော်ကြင်နာဦး သက်ဆုံးတိုင်မယ်

CHO:     အညှာလွယ်လွယ် တို့အသည်း … နုနုငယ်ငယ်
ကြွေပြီနော် ချိုအသည်း … ပြုံးသူ့သက်လှယ် ရုန်းဘူးနော့် မျက်ခြယ် … ဆုံးခန်းထိအောင် …

V3:       ပိုးချည်မျှင် လွန်းရက်ကန်းတင် … အကွက်လှလှလိမ်းခြယ်
ထားသစ္စာခိုင်စေဦး ရွက်လူးပျိုငယ်
ဘဝပုံကာချစ်ကြစို့ကွယ် … တိုးရစ်ပတ်အချစ်နွယ်
စိမ်းလဲ့ရေကြည်စေဦး … ချစ်ပြုံးစီခြယ်  …။

ချစ်လို့လှတဲ့ ချစ်သူရဲ့ အလှအပနဲ့ သက်ဆုံးတိုင် ချစ်ခင်ကြင်နာမယ့်အကြောင်းကို ဖွဲ့ဆိုထားတာဖြစ် ပေမယ့် စကားလုံး အသုံးအနှုန်းနဲ့ တင်စားဖွဲ့ဆိုမှုတွေဟာ မြန်မာစာပေကို ထဲထဲဝင်ဝင် လေ့လာလိုက်စား သူတဦးဖြစ် ကြောင်း သိသာ ထင်ရှားလှပါတယ်။ သံစဉ်ကလည်း ရှားပါးတဲ့ မြန်မာဟန်ပါတဲ့ Jazz  ပုံစံ ဖြစ်ပါတယ်။ သီချင်းကို  Arrangement လုပ် ပေးသူက လီယိုနာ့ဒ် ကိုမောင်မောင်လွင်ပါ။
အနုပညာကို ချစ်တဲ့စိတ်၊ ဂီတအနုပညာသမား တွေကို လေးစားတဲ့စိတ်၊ သီချင်းတွေကို အလေးအနက် တန်ဖိုးထား တတ်တဲ့ စိတ် ရှိတဲ့ စိုးလွင်လွင် တယောက် ကွယ်လွန်ခဲ့တာ နှစ်ပေါင်းများစွာကြာပါစေ သူရှင်သန် စဉ်က ပြုမူ လှုပ်ရှားခဲ့သမျှ ပုံရိပ်တွေကတော့ ကျနော့် နှလုံးသားထဲမှာ ထပ်ဟပ်ကျန်ရစ် နေဆဲပါ။ တကယ်တော့ စိုးလွင်လွင်ဟာ သူချစ်တဲ့ တေးသီချင်းတွေနဲ့ လောကကြီးကို အပြုံးပန်း စီခြယ်ခဲ့သူ မဟုတ်ပါလားခင်ဗျာ။

http://burma.irrawaddy.org/entertainme…/2015/…/03/69318.html