မြန်မာပုံနှိပ်စာအုပ်များ၏နိဒါန်း
ကျွန်တော်တို့ လက်ရှိအလွယ်တကူကိုင်တွယ်ဖတ်ရှုနေကြတဲ့  ပုံနှိပ်စာအုပ်များမြန်မာပြည်မှာ စတင်ရောက်ရှိတာကို ပြောပြချင်တာပါ။
ရှေးရှေးတုန်းကတော့ ရွံ့ ပေါ်မှာ ရေးပြီးတော့ မီးဖုတ်ရတဲ့  အုတ်ခွက်စာ၊ စဥ့်ကွင်းစာ၊ ကျောက်ထက်မှာရေးတဲ့ ကျောက်စာ၊ ဘုရား၊ဂူ၊ကျောင်း နံရံတွေမှာရေးတဲ့ မင်စာ၊ ပေရွက်ကို ပြုပြင်ပြီးရေးထားတဲ့ ပေစာ၊ ပုရပိုဒ်စာ၊ ခေါင်းလောင်းစာစတဲ့ ရေးသားနည်းတွေထဲမှာ ပေစာနဲ့ ပုရပိုဒ်တို့ ဟာ အသုံးတွင်ကျယ်ခဲ့ ပါတယ်။
မြန်မာနိုင်ငံမှာ အစောဆုံး ဖြန့် ချိ နိုင်တဲ့  ပုံနှိပ်စာအုပ် တွေကတော့ ခရစ်ယာန် ဘာသာရေးဆိုင်ရာ စာအုပ်တွေနဲ့  မြန်မာ သင်ပုန်းကြီး စာအုပ်တို့ ဘဲဖြစ်ပါတယ်။ အဆိုပါ စာအုပ်တွေဟာ ၁၇၇၀ ခုနှစ်၊ (လွန်ခဲ့ သောနှစ်ပေါင်း (၂၄၀) ခန့် လောက်)က ဖြစ်ပါတယ်။
ခရစ်ယာန်ကျမ်းစာအုပ်တွေကတော့ ခရစ်ယာန်ဘာသာ ပြန့် ပွားရေးအတွက် ဖြစ်ပြီးတော့၊ သင်ပုန်းကြီး စာအုပ်ကတော့ ခရစ်ယာန် ဘုန်းတော်ကြီးတွေက သူတို့ ရဲ့ တပည့်တွေကို မြန်မာစာ သင်ကြားပေးဖို့ အတွက်၊ နောက်ပြီး နိုင်ငံခြားသား(အထူးသဖြင့်၊ မြန်မာနိုင်ငံရောက် အနောက်နိုင်ငံသား) တို့ ကို မြန်မာစာ သင်ကြား ပေးဖို့ အတွက် ဖြစ်ပါတယ်။
ဗရင်ဂျီ ဘုန်းတော်ကြီး ကာပါးနီးဟာ ၁၇၄၀ ပြည့်နှစ်လောက်မှာ သံလျှင်မြို့ ကိုရောက်လာပါတယ်။ အဲဒိအချိန်ကနေ နှစ်ပေါင်း (၃၀) လောက် သာသနာပြုခြင်း၊ မြန်မာစကားသင်ခြင်းနဲ့  မြန်မာစာပေကို လေ့ လာသင်ယူခြင်းတွေ ပြုလုပ်ပြီး အီတလီ နိုင်ငံ ရောမ မြို့ ကို ပြန်သွားပါတယ်။ ရောမ ကိုရောက်ပြီးသိပ်မကြာခင်မှာဘဲ မြန်မာ အက္ခရာ ခဲစာလုံးတွေကို တီထွင်သွန်းလုပ်ပြီး ရောမမြို့ သာသနာပြု ပုံနှိပ်တိုက်မှာ အထက်မှာဖေါ်ပြခဲ့  တဲ့  ကျမ်းစာတွေနဲ့  သင်ပုန်းကြီးစာအုပ်တို့ ကို ရိုက်နှိပ်ခဲ့ ပါတယ်။
နိုင်ငံခြားမှာ ပုံနှိပ်တဲ့  ဒုတိယ အစောဆုံး မြန်မာပုံနှိပ်စာအုပ်ကတော့  အင်္ဂလိပ်၊ မြန်မာ၊ မာလာယု၊ ယိုးဒယား အဘိဓာန် စာအုပ်ဖြစ်ပါတယ်။ ၁၈၁၀ ခုနှစ်၊ ကလကတ္တား မြို့ အနီးက ဆာရမ်ပူမြို့ ရဲ့  နှစ်ခြင်းသာသနာပြု ပုံနှိပ်တိုက်မှာ ရိုက်နှိပ်တာဖြစ်ပါတယ်။ ခရစ်ယာန် သာသနာပြု ဆရာတွေ မြန်မာ၊မာလာယုနဲ့ ယိုးဒယား စာ သင်ကြားနိုင်ဖို့  အတွက် ဖြစ်ပါတယ်။
အဲဒိပုံနှိပ်တိုက်ကနေပြီး ၁၈၂၁ ခုနှစ်မှာ “တမန်တော်ဝတ္တု”၊ ၁၈၃၂ ခုနှစ်မှာ ”အရှင်သခင် ယေရှုခရစ်၏ ဓမ္မသစ်ကျမ်း” တွေကို ရိုက်နှိပ်ထုတ်ဝေခဲ့ ပါတယ်။
ဘကြီးတော်ဘုရားလက်ထက် ၁၈၂၄-၂၆ ခုနှစ်မှာ မြန်မာနဲ့ အင်္ဂလိပ်တို့  ပထမ အကြိမ် စစ်ဖြစ်ပွားပြီး ရခိုင်နဲ့  တနင်္သာရီ တို့ အင်္ဂလိပ်လက်ကျရောက်သွားတဲ့ အခါမှာ ခရစ်ယာန်သာသနာပြုဆရာတွေဟာ မော်လမြိုင်၊ ထားဝယ်၊ စစ်တွေ မြို့ တွေမှာ အခြေကျလာကြပါတယ်။ အဲဒိမြို့ တွေမှာ ခရစ်ယာန် ဘာသာရေး စာအုပ်တွေ ရိုက်နှိပ် နိုင်ဖို့ အတွက် ပုံနှိပ်စက် တွေ တည်ထောင်လာကြပါတယ်။
၁၈၃၀ ပြည့်နှစ်လောက်မှာ အမေရိကန် နှစ်ခြင်းသာသနာပြု ပုံနှိပ်တိုက်က ပုံနှိပ်ဆရာလည်းဖြစ် တရားဟော ဆရာလည်းဖြစ်တဲ့  မစ္စတာဘဲနက် ဟာ ဆရာယုဒသန် (ခေါ်) ဒေါက်တာဂျပ်ဆင် နဲ့ တိုင်ပင်ပြီးတော့ အမေရိကန်ပြည်မှာ မြန်မာ အက္ခရာ ခဲစာလုံးကို တီထွင်သွန်းလုပ်ပါတယ်။ ၁၈၃၃ ခုနှစ် ဇန်နဝါရီလ (၁) ရက်နေ့ မှာ ပုံနှိပ်ဆရာ မစ္စတာ ဟင်းကောက် ဟာ ပုံနှိပ်စက်နှစ်လုံးနဲ့  မြန်မာ ခဲစာလုံးတွေကို အမေရိကန်ပြည်ကနေ မော်လမြိုင် ကို ယူဆောင်ရောက်ရှိလာပါတော့တယ်။
အဲဒိပုံနှိပ်တိုက်ရဲ့ အမည်ကတော့ အမေရိကန် သာသနာပြု ပုံနှိပ်တိုက်( A.B.M.Press) ဖြစ်ပါတယ်။ အခုချိန်ထိဆိုရင် မြန်မာနိုင်ငံကို ပုံနှိပ်စက် စပြီးရောက်ခဲ့ တာ နှစ်ပေါင်း (၁၈၀) နီးပါး ကြာခဲ့ ပြီဖြစ်ပါတယ်။
အမေရိကန် သာသနာပြု ပုံနှိပ်တိုက်( A.B.M.Press) ကနေပြီးတော့ ထာဝရ ဘုရား၏ ဓမ္မဟောင်းကျမ်း၊ ထာဝရဘုရား၏ သမ္မာကျမ်း၊ ခရစ်ယာန်၏ ဝတ္တု စတဲ့  ခရစ်ယာန် ဘာသာရေးစာအုပ်တွေအပြင်၊ “မြန်မာမင်းနှင့် အင်္ဂလိပ်မင်းတို့  စ၍ စစ်ဖြစ်ကြသည့်အကြောင်း”(သမိုင်း)၊ “မောင်နကော၏ ပဌမ ဖတ်စာ”(ကျောင်းသုံးစာအုပ်) တွေ ရိုက်နှိပ်ခဲ့ ပါတယ်။
ထားဝယ်မြို့ ပုံနှိပ်တိုက်က ခရစ်ယာန် ဘာသာရေးစာအုပ်တွေအပြင် ပိုးကရင်ဘာသာနဲ့  “ဆန်တူဂီ” အမည်ရှိ သတင်းစာကို လည်း ပုံနှိပ်ထုတ်ဝေခဲ့ ပါတယ်။
စစ်တွေမြို့ ပုံနှိပ်တိုက်ကတော့ “သုဓမ္မစာရီ မင်းသမီး ဖြတ်ထုံး ဓမ္မသတ်”၊ “ဓမ္မပဒဝတ္ထု” စတဲ့  လောကီ လောကုတ္တရာ အကျိုးပြု စာအုပ်မျိုးတွေ ရိုက်နှိပ်ခဲ့ ပါတယ်။
၁၈၅၂ ခုနှစ်၊ ပုဂံမင်းလက်ထက် အင်္ဂလိပ်-မြန်မာ ဒုတိယ စစ်ပွဲ အပြီးမှာ အင်္ဂလိပ်တို့  အောက်မြန်မာနိုင်ငံ တစ်ခုလုံးကို ရရှိသွားပါတယ်။ အင်္ဂလိပ်ပိုင် ရန်ကုန်မြို့ မှာ လူမျိုးခြားတွေပိုင်တဲ့  ခရစ်ယာန်သာသနာပြု ပုံနှိပ်တိုက်များ၊ အင်္ဂလိပ်လူမျိုးပိုင် ပုံနှိပ်တိုက်များ၊ မြန်မာလူမျိုးပိုင် ပုံနှိပ်တိုက်များ ပေါ်ပေါက်လာပါတယ်။
အဲဒိပုံနှိပ်တိုက်တွေကနေ စာအုပ်စာတမ်း တွေတင်မဟုတ်ဘဲ သတင်းစာ များပါ ရိုက်နှိပ်ထုတ်ဝေ လာကြပါတယ်။
ရှေးဦးထုတ်ဝေခဲ့ ကြတဲ့  သတင်းစာတွေကတော့
(၁)၁၈၄၂ ခုနှစ်၊ (ပုဂံမင်းလက်ထက်)မော်လမြိုင်မြို့  ခရစ်ယာန်သာသနာပြု ပုံနှိပ်တိုက်က ထုတ်ဝေတဲ့ ”ဓမ္မသိတင်းစာ”
(၂)၁၈၇၄ခုနှစ်၊(မင်းတုန်းမင်းလက်ထက်) မြန်မာမင်းအုပ်ချုပ်တဲ့ အထက်မြန်မာနိုင်ငံ မန္တလေးမြို့  မှ ထုတ်ဝေတဲ့  “ရတနာပုံနေပြည်တော်သတင်းစာ”
(၃)၁၈၉၄ခုနှစ်၊(သီပေါမင်းပါတော်မူပြီး) ရန်ကုန်မြို့ မှထုတ်ဝေတဲ့  “မြန်မာအဆွေသတင်းစာ”
တို့ ဖြစ်ပါတယ်။အဲဒိသတင်းစာတွေဟာ နေ့ စဉ်ထုတ် မဟုတ်ကြပါ။ မော်လမြိုင်မြို့ ထုတ် “ဓမ္မသိတင်းစာ” ဟာ တစ်လ တစ်ကြိမ်ထုတ်ဝေခဲ့ပါတယ်။
အင်္ဂလိပ်တို့ မြန်မာနိုင်ငံကို တတိတိနှင့် တစ်ပြည်လုံးသိမ်းပိုက်ပြီးတဲ့ အချိန်မှာတော့ ရန်ကုန်မြို့ မှာ ပုံနှိပ်တိုက်များစွာ တိုးတက် ပေါ်ပေါက်လာပါတယ်။
အဲဒါတွေကတော့
(၁) အစိုးရပုံနှိပ်တိုက်
(၂) အမေရိကန် သာသနာပြု ပုံနှိပ်တိုက်( A.B.M.Press)
(၃)မြန်မာသံတော်ဆင့် ပုံနှိပ်တိုက်
(၄)ဗြိတိသျှဘားမား ပုံနှိပ်တိုက်
(၅)ရန်ကုန်ဂေဇက် ပုံနှိပ်တိုက်
(၆)ဟံသာဝတီ ပုံနှိပ်တိုက်
(၇)ပြည်ကြီးမဏ္ဍိုင် ပုံနှိပ်တိုက်
(၈)ကဝိမျက်မှန် ပုံနှိပ်တိုက်
(၉)ဇမ္ဗူ့ ကြက်သရေ ပုံနှိပ်တိုက်
(၁၀)ဇမ္ဗူ့ မိတ်ဆွေ ပိဋကတ် ပုံနှိပ်တိုက်
(၁၁)သုဓမ္မဝတီ ပိဋကတ် ပုံနှိပ်တိုက်
(၁၂)မြန်မာ့ သြဘာ ပုံနှိပ်တိုက်
(၁၃)ဇေယျာ ပူရိန် ပုံနှိပ်တိုက်
(၁၄)လောကသာရ ပုံနှိပ်တိုက်
(၁၅) မြန်မာ့ ကြက်သရေ ပုံနှိပ်တိုက်
(၁၆)လောကပါလ ပုံနှိပ်တိုက်
တို့ ဖြစ်ကြပါတယ်။ ရန်ကုန်မြို့ မှာ ပုံနှိပ်တိုက်တွေ ပေါ်လာကြသလို မန္တလေး၊ပုသိမ်၊မကွေး၊ တောင်ငူ၊ နတ္တလင်း၊ သုံးဆယ် စတဲ့ မြို့ တွေမှာလည်း ပုံနှိပ်တိုက်များ ဖွင့်လှစ်လာကြပါတယ်။
ပြည်မြို့  တီ-ဂျီ ဘရားသား ပုံနှိပ်တိုက်က ပြည်မြို့ ရွှေဆံတော်စေတီသမိုင်းကို ပုံနှိပ်ခဲ့ ပြီး ၁၉၁၁ ခုနှစ်မှာ “ဂီတမေဒနီ” စာအုပ်ကို ပထမဆုံး ရိုက်နှိပ်ခဲ့ ပါတယ်။
ပြည်မြို့ ကဘဲ ပဉ္စရူပံ ပုံနှိပ်တိုက်ပိုင်ရှင် ဦးခ ဟာ မြန်မာ မူဆလင် ဖြစ်ပေမယ့်  မြန်မာမှုကို မြတ်နိုးတဲ့ အတွက် “မိန်းမမှု”၊”တစ္ဆေပုံညွန့် ပေါင်း”၊ “ချွေတာရေး” စတဲ့ စာအုပ်တွေကို ရိုက်နှိပ်ခဲ့ ပါတယ်။
မြန်မာ ပုံနှိပ်တိုက်များ ပေါ်ပေါက်ခါစ က ပုံနှိပ်တိုက် အသီးသီးက ရိုက်နှိပ်ထုတ်ဝေခဲ့ ကြတဲ့  စာအုပ်တွေကို လေ့ လာကြည့်မယ်ဆိုရင် ဘာသာရေးဆိုင်ရာကျမ်းများ၊ သမိုင်းဆိုင်ရာများ၊ အင်္ဂလိပ်ဘာသာကနေ မြန်မာဘာသာ ပြန်ဆိုတဲ့  မဟာရာဇဝင်ချုပ်(အင်္ဂလိပ်ရာဇဝင်)၊ မဏိရတနာပုံကျမ်း၊ ဓမ္မသတ်ကျမ်းများ၊ ကျောင်းသုံးစာအုပ်အမျိုးမျိုး၊ သတ်ပုံကျမ်းများ၊ နိပါတ်တော်လာဝတ္ထုများ၊ ပြဇာတ်များ၊ ပျို့ များ၊ စတာတွေကို ကျယ်ပြန့် စွာ တွေ့ ရှိရမှာဖြစ်ပါတယ်။
၁၉၀၄ ခုနှစ်လောက်မှာ ပေ၊ ပရပိုဒ် ထက်အက္ခရာ တင်ခဲ့ သမျှ မြန်မာ စာ အမျိုးမျိုးတို့ ဟာ (ပိဋကတ်သုံးပုံကအစ ခေတ်ပေါ်ပြဇာတ်များအဆုံး)အားလုံးလိုလို ရိုက်နှိပ်ထုတ်ဝေပြီး ဖြစ်ခဲ့ ပါတယ်။ လွယ်လွယ်ကူကူ ဖတ်ခွင့်ရကြပြီး အကြိမ်ကြိမ် အဖန်ဖန် ဖတ်ရှု ပြီး ဖြစ်လာကြတဲ့  အခါတဖြည်းဖြည်း ငြီးငွေ့ လာကြပါတော့တယ်။
စာရေးသူတွေအနေနဲ့ လည်း စာအဟောင်းများနဲ့ မတူတဲ့  စာပုံစံအသစ်အဆန်းများကို ရေးလိုစိတ်လည်း ဖြစ်ပေါ်လာကြပါတယ်။
ပြင်သစ် စာရေးဆရာကြီး အလက်ဇန္ဒားဒူးမား ရေးပြီး အင်္ဂလိပ်ဘာသာပြန်ဆိုထားတဲ့  မွန်တီခရစ်တို မြို့ စားကြီး ဝတ္ထုကို ဂျိမ်းစ်လှကျော် က “မောင်ရင်မောင်မမယ်မ” ဆိုပြီးမှီငြမ်းကာ မြန်မာမှုပြုရေးသားထုတ်ဝေခဲ့ ပါတယ်။ အဲဒါနဲ့  မရှေးမနှောင်းမှာ ဝန်စာရေးဦးကြီးက “ချဉ်ပေါင်ရွက်သည်မောင်မှိုင်း” ဝတ္ထု ကို ရေးပြီးထုတ်ဝေခဲ့ ပါတယ်။
အဲဒိ ဝတ္ထုများဟာ ရှေးယခင်က ရှိခဲ့ ဖူးသော စာပေ ပုံစံမျိုးများ မဟုတ်ကြတော့ဘဲ၊ တမူထူးခြားဆန်းသစ်လာခြင်း၊ လူ့ လောကနှင့် ပိုမိုနီးစပ်လာခြင်း၊ သဘာဝယုတ္တိ ရှိလာခြင်း တို့ အပြင် စာဖတ်သူအများစု တို့ ရဲ့ စိတ်အာသီသ များ ပြောင်းလဲ လာတဲ့ အတွက်ကြောင့် ခေတ်စမ်း စာပေ ပုံစံသစ်ဆီသို့ တဖြည်းဖြည်းရောက်ရှိလာခဲ့ ပါတယ်။
ဒီမှာတင်ဘဲ မြန်မာပုံနှိပ်စာအုပ်များရဲ့ နိဒါန်း အကျဉ်း ကို အဆုံးသတ်လိုက်ပါတယ်။
ကိုး- (၁) မြန်မာ့စွယ်စုံကျမ်း
(၂)စာအုပ်စာပေ(တတိယတွဲ)၊၁၉၇၃၊ စာပေဗိမာန်။
ကညွှတ်နွယ်(ထီလာ)
No comments:
Post a Comment