ပြင်ဦးလွင်မြို့က မေတ္တာတရား ကြီးမားသူ

“သူတို့ကျွေးမွေးဖို့အတွက် အန်တီပိုင်ဆိုင်တဲ့ ခြံလေးတွေကို ရောင်းချပြီး ဘဏ်ထဲမှာ သတ်သတ် ငွေထည့်ထားတယ်” ဟု ပြောလာသူမှာ ခွေးအကောင် ၃၀၀ နီးပါးကို မွေးမြူထားသည့် အသက် ၅၈ နှစ်အရွယ် ဒေါ်ခင်သန်းဝေ ဖြစ်သည်။

လွန်ခဲ့သည့် နှစ် ၂၀ ကျော် ကတည်းက ထိုကဲ့သို့ ခွေးများကို သူမွေးမြူ စောင့်ရှောက်ထားခြင်း ဖြစ်သည်။ လမ်းဘေးတွင် စွန့်ပစ်ခံထားရသော ခွေးများလည်း ပါသည်။ အိမ်တွင် လာရောက် စွန့်ပစ်ထားသော ခွေးများ၊ ဒုက္ခိတ ခွေးများကိုလည်း သူကျွေးမွေး စောင့်ရှောက်ထားသည်။ အားလုံးကို သူ့သားသမီးနှင့် မခြား အရိပ်တကြည့်ကြည့်နှင့်။

သားသမီး သုံးဦး၏ မိခင်လည်းဖြစ်သူ ဒေါ်ခင်သန်းဝေသည် မန္တလေးတိုင်းဒေသကြီး ပြင်ဦးလွင်မြို့နယ် နန္ဒဝန်ရပ်ကွက်၊ ရပ်ကွက်ကြီး (၉)၊ အိမ်အမှတ် (၄၉၉-က) တွင် နေထိုင်ပြီး ခွေးများ မွေးရန်အတွက် ယခုခြံကို ဝယ်ယူခဲ့ကာ တိုက်အိမ်လေး ဆောက်လုပ်ခဲ့ခြင်း ဖြစ်သည်။

ဒေါ်ခင်သန်းဝေ၏ ခင်ပွန်းဖြစ်သော ဗိုလ်ကြီးအငြိမ်းစား ဦးတွမ်သည် ယခုလက်ရှိတွင် ကျန်းမာရေး အခြေအနေအရ အိပ်ရာထဲမှ မထနိုင်ဖြစ်နေပြီး ခင်ပွန်းကိုလည်း ပြုစုရင်း တစ်ဖက်တွင်လည်း ၎င်းချစ်ခင် ပြုစုစောင့်ရှောက်နေသည့် ခွေးအကောင် ၃၀၀ နီးပါး၏ နေ့စဉ် အလုပ်တာဝန်များကိုလည်း မမောမပန်းနိုင် အိမ်အကူ မောင်နှစ်မ နှစ်ဦးနှင့် လုပ်ဆောင်လျက် ရှိသည်။

“အိမ်မှာ မွေးထားပြီးတဲ့ ခွေးတွေကို ဘယ်သူလာတောင်းတောင်း မပေးဘူး။ သူတို့အတွက် တစ်နေ့ ကုန်ကျစရိတ်က ကျပ် ၆၀,၀၀၀ နီးပါး ကုန်ပေမယ့်လည်း အန်တီက သူတို့အတွက် လာလှူရင်လည်း သိပ်ပြီးတော့ လက်မခံဘူး” ဟု ဒေါ်ခင်သန်းဝေက ဆိုသည်။

အဆိုပါခွေးများ နာမကျန်း ဖြစ်ခဲ့သော အခါများတွင်လည်း ကိုယ်တိုင် ဆေးဝါးများဖြင့် ကုသပေးသကဲ့သို့ ကာကွယ်ဆေးထိုးသည့် အချိန်တွင်လည်း ဆရာဝန်များကို ခေါ်ကာ သေသေချာချာ ဆေးဝါးများ ကုသပေးလျက် ရှိသည်။

ဒေါ်ခင်သန်းဝေ၏ သားသမီး သုံးဦးမှာ အစိုးရဝန်ထမ်းများ ဖြစ်ကြပြီး သူ့တို့ဘဝကို သူတို့ဘာသာ ရပ်တည်နိုင်ကြပြီ ဖြစ်သည်။ လက်ရှိတွင် ခင်ပွန်းကို ပြုစုစောင့်ရှောက်ရင်း ကိုယ်ပိုင်လုပ်ငန်း အဖြစ် ခြံများကို ဝယ်ရောင်းလုပ်ကိုင်ခဲ့သည်။ ထိုသို့ စီးပွားရေးလုပ်၍ ငွေကြေးများ ရလာပါက ပျော်ရွှင်ရကြောင်း၊ ပျော်ရွှင်ရသည့် အကြောင်းရင်းမှာလည်း မွေးမြူထားသော ခွေးများကို ဒီထက်မက အစာဝဝလင်လင် ကျွေးမွေးလို၍ ဖြစ်ကြောင်း ဒေါ်ခင်သန်းဝေက ဆိုသည်။

ယခုအချိန်တွင် ဒေါ်ခင်သန်းဝေမှာ အသက်အရွယ်အရ စီးပွားရေး မလုပ်ဆောင်တော့ဘဲ ပိုင်ဆိုင်သည့် ခြံသုံးခြံကို ရောင်းချပြီး ဘဏ်ထဲတွင် အပ်နှံကာ ခွေးများကို ကျွေးမွေး စောင့်ရှောက်ထားပြီး ၎င်းမရှိတော့သည့် နောက်တွင်လည်း ၎င်းမွေးမြူထားခဲ့သည့် ခွေးများ နောင်ရေးအတွက်ပါ စီစဉ်ထားသည်။

“အခု ခြံတစ်ခြံကို သိန်းငါးထောင်ကျော်နဲ့ ဈေးစကား ပြောထားတာ ရှိတယ်။ ဒီခြံ အရောင်းအဝယ် တည့်သွားရင် ရတဲ့ ပိုက်ဆံကို လေးပုံပုံပြီး ဘဏ်ထဲမှာ အပ်နှံထားလိုက်မယ်။ သုံးပုံကတော့ သားသမီးတွေအတွက် တစ်ပုံကတော့ အန်တီ့ခွေးတွေ အတွက်ပါ။ သားသမီးတွေကိုလည်း စာချုပ်နဲ့ ချုပ်ဆိုပြီး ခွဲဝေပေးမှာ။ သူတို့အတွက် ပေးထားတဲ့ သုံးပုံကို အကုန်လုံး မထုတ်ယူခိုင်းဘဲ အတိုးသာ ထုတ်ခိုင်းမယ်။ အန်တီ့ခွေးတွေ အတွက်ထားတဲ့ တစ်ပုံကိုတော့ လုံးဝ မထုတ်ယူရဘူး” ဟု ခွေးလေးများကို အစာကျွေးရင်း အန်တီ ဒေါ်ခင်သန်းဝေက ဆိုလိုက်သည်။

ယခုလက်ရှိတွင် ခွေးအကောင် ၃၀၀ နီးပါးကို နေ့စဉ် ပြုစုစောင့်ရှောက်နေသော သူ့အတွက် ခွေးများနှင့် ပတ်သက်သော ဖြစ်ရပ်များလည်း ရှိသည်။
ခွေးမလေး ချောစုအပေါ် ဒေါ်ခင်သန်းဝေ သံယောဇဉ် အရှိဆုံးဖြစ်သည်။ လွန်ခဲ့သည့် ၁၅ နှစ်ကျော် ကတည်းက မန္တလေး-ပြင်ဦးလွင် ကားလမ်းဘေးတွင် ချောစုကို တွေ့ရှိကာ အိမ်တွင် ခေါ်ယူမွေးမြူခဲ့ခြင်း ဖြစ်သည်။ ယနေ့အချိန်အထိ ချောစုအကြောင်း တွေးမိ၊ ပြောမိလျှင် မျက်ရည် မဆည်နိုင်သေး။

“ဒီခွေးမလေးက အရမ်းလိမ္မာတယ်။ လူဝင်စား ခွေးမလေးလို့တောင် ထင်ရတယ်။ အန်တီ့ကိုလည်း အရမ်းချစ်တယ်။ သူက အနက်ရောင် ခွေးပုမျိုးလေး” ဟု သူက ဝမ်းနည်းစွာ ဆိုသည်။

သူ့အနားတွင်သာ မသေဆုံးခင် အချိန်အထိ ချောစု နေသွားခဲ့သည်။ ဒေါ်ခင်သန်းဝေမှာ တစ်ညလုံး မေတ္တာပို့၊ အမျှဝေပေးခဲ့ပြီး နံနက် ၁ နာရီလောက်တွင် ချောစု သေဆုံးသွားခဲ့သည်။ သူ မွေးမြူထားသော ခွေးများ သေဆုံးခါနီး အချိန်တိုင်းတွင် အမြဲမေတ္တာပို့ကာ သူ ဆုတောင်းပေးလေ့ ရှိသည်။

“နောက်ဘဝတွေမှာ အခုဘဝလို ခွေးဘဝ ဘယ်တော့မှ မရောက်ပါစေနဲ့။ ခွေးမဖြစ်ပါစေနဲ့လို့ပေါ့။ သူတို့သေသွားရင်လည်း အန်တီ ဘယ်တော့မှ လွှင့်မပစ်ဘူး၊ ခြံထဲမှာပဲ အမြဲ ကောင်းကောင်းမွန်မွန် မြှုပ်နှံပေးတယ်” ဟု ဒေါ်ခင်သန်းဝေက ငိုရင်းပြောဆိုသည်။

The Voice

https://www.facebook.com/royalheromedia/photos/a.452811328083074.110728.452793