သဲအိုးထဲက ရေအေးအေး

                   
ရေးသားသူ- ညီညီဇော်

တစ်စတစ်စပူပြင်းလာသည့် ရာသီဥတုကြောင့် ရေအေးအေးတစ်ခွက်တော့ဖြင့် တကျိုက်ကျိုက်သောက်ချင်သည့်ဆန္ဒ မကြာခဏပေါ်ပေါက်နိုင်ပါသည်။ ခေတ်ကာလအလျောက် ရေခဲသေတ္တာတို့၊ ရေအေးစက် (၀ါတာကိုလာ)တို့က လက်တစ်ကမ်းမှာ အလွယ်တကူရောက်နေကြပြီမို့ ရေအေးအေးတစ်ခွက် သောက်ရဖို့ အခက်အခဲတော့မရှိနိုင်ပါ။ ထိုကဲ့သို့ နည်းပညာဖြင့် ရေအေးအောင်ပြုလုပ်နိုင်သည့် တန်ဖိုးကြီးပစ္စည်းများနှင့် ယှဉ်ပြိုင်နိုင်သည့် မြန်မာ့ရိုးရာ လက်မှုပစ္စည်းလေးတစ်မျိုးရှိနေပါသည်။ ထိုပစ္စည်းလေးက ရေခဲသေတ္တာတို့၊ ရေအေးစက်တို့လို ရေအေးအေးတစ်ခွက်သောက်ရဖို့အရေး ငွေသိန်းချီသုံးရန်မလိုပါ။ အစိုးမရတတ်သည့် လျှပ်စစ်မီးကိုလည်း မျှော်နေစရာမလိုပါ။ မြန်မာ့ရိုးရာ လက်ဖြစ်သဲအိုးလေးတစ်လုံး ဆောင်ထားရန်သာလိုသည်။

ထိုသဲအိုးထဲမှ ရေအေးအေးလေးကိုသောက်ရဖို့ ဖြတ်သန်းရသည့်လုပ်ငန်းတွေက များလွန်းလှသည်။ ပထမဆုံးအဆင့်အနေဖြင့် ရွှံ့စေးမြေများကို သံတူရွင်းများဖြင့် စတင်တူးယူရသည်ဟု မြေသဲအိုးများထွက်ရှိနေသည့် သမိုင်းဝင်မြင်းခြံခရိုင် ရန္တပိုရွာမှ အိုးလုပ်ငန်းလုပ်ကိုင်သူများက ဆိုပါသည်။ ရန္တပိုရွာသည် ဧရာဝတီမြစ်ဘေးတွင်ရှိ၍ မြစ်ရေကျချိန် မြစ်ကမ်းပါးဘေး အလွှာအထပ်ထပ် မြေသားများထဲမှ အလယ်ရွှံ့စေးမြေကို တူးယူကြသည်။ တူးလာသည့်ရွှံ့စေးမြေခဲကြီးများကို အိမ်တွင်အခြောက်လှန်းရသည်။ အခြောက်လှန်းပြီးလျှင် စဥ့်အိုးပြတ်ဖြင့် ရေစိမ်ရသည်။ ရေစိမ်ပြီးရွှံ့စေးမြေများကို သဲဖြင့်တစ်ခါ အချိုးအစားအလိုက် ပြန်နယ်ရသည်။ သဲနယ်တာကိုတော့ များသောအားဖြင့်
အမျိုးသားတွေက ပြုလုပ်ရတာများသည်။ ချွေးဒီးဒီးကျသော အလုပ်ဖြစ်သောကြောင့်ဖြစ်၏။

ပီနံအိတ်ကိုဖြန့်ကာ သဲကိုအောက်ကခင်း၊ အပေါ်ကရွှံ့စေးမြေတင်ကာ ခြေထောက်ဖြင့်နယ်ရခြင်းဖြစ်သည်။ ထိုသဲနယ်သည့်နေရာတွင်တော့ သတိထားရသည်။ သဲများလေအေးလေဆိုပေသိ သဲများသွားလွန်းလျှင်လည်း အိုးက ရေစိမ့်လွန်းအားကြီးသည်။ သဲနည်းသွားလျှင်လည်း မအေးတော့ပြန်။ သတ်မှတ်ထားသည့် အချိုးအစားကတော့ ရွှံ့စေးမြေ ရှစ်ပြည်ဝင်ခွဲဝင်တောင်း ခြောက်တောင်းဆို သဲကသုံးတောင်းဖြစ်သည်။

သဲနယ်ပြီးသား မြေတွေကိုတော့ အိုးပြင်တဲ့နေရာမှာ အိုးထွင်းရသည်။ အိုးထွင်းအပြီး ရလာတဲ့အိုးပုံကြမ်းကို နှစ်နာရီခန့် နေရောင်နုနုပြရသည်။ နေရောင်ပြပြီးအိုးကို အရိပ်ထဲတွင်ထားကာ လေဖြင့်ခြောက်သွေ့စေရသည်။ အရိပ်ထဲတွင်ထားဖို့ အိုးအရေအတွက်များတာမို့ အိုးထားဖို့နေရာမရှိတာကြောင့် အိမ်အပေါ်ထပ်တွင်ပါ သိမ်းရတော့သည်။ ဒါကြောင့် ရန္တပိုရွာကအိမ်တွေရဲ့ အပေါ်ထပ်မှာ အိမ်သားတွေနေဖို့ဝေးစွ။ အိုးတွေက ပြောင်ပြောင်ပင် အိမ်ဦးခန်းမှာနေရာယူထားကြသည်။ ‘‘အိမ်ရဲ့ကောင်းတဲ့နေရာ သူတို့ယူထားတာ။ လူတွေကတော့ ဖြစ်သလို အိမ်အောက်ထပ်ချောင်ကြိုချောင်ကြားထဲပဲ နေလိုက်တာပဲ’’ဟု ရန္တပိုရွာမှ အိုးလုပ်ငန်းလုပ်ကိုင်သူ အမျိုးသမီးတစ်ဦးက ရယ်မောရင်းပြောပြသည်။

အဲဒီလို လေနဲ့ အနည်းငယ်ခြောက်သွားသည့် အိုးစိမ်းတွေကို တစ်နေ့မှာ ပုံဖော်ရပါသည်။ အဲဒီအဆင့်ကိုတော့ အိုးလောင်းသည်ဟုခေါ်ပါသည်။ အိုးလောင်းပြီး ပန်းဒီဇိုင်းဖော်တာကို အိုးမော်သည်ဟုခေါ်ပြန်သည်။ နောက်ဆုံး အချောသပ်တာကိုတော့ အိုးရှပ်သည်ဟုခေါ်ပြန်သတဲ့။

အိုးစိမ်းအဆင့်ပြီးပြီဆို အိမ်အတွင်းမှာ ပြန်သိမ်းထားရသည်။ မိမိတို့သတ်မှတ်ထားသော အိုးအရေအတွက်ပြည့်ပြီဆိုလျှင် အိုးဖုတ်ရန်အတွက် ပြင်ဆင်ကြပြီဖြစ်သည်။ များသောအားဖြင့် အိုးအလုံးရေနှစ်ထောင်မှ လေးထောင်ကြား ဖုတ်ကြတာများသည်။ အိုးစိမ်းအဆင့်လုပ်ငန်းတွေမှာတော့ မိမိအိမ်မှာရှိတဲ့မိသားစုနဲ့ လုပ်လို့ရပေမယ့် အိုးဖုတ်တဲ့အဆင့်ကတော့ အိမ်ရှိလေးငါးယောက်ဖြင့် လုပ်၍မရတော့ပါ။

ရန္တပိုရွာ၏ အိုးလုပ်ငန်းဓလေ့ကတော့ ရွာအတွင်း အိမ်တစ်အိမ် အိုးဖုတ်တော့မည်ဆိုလျှင် တစ်အိမ်တစ်ယောက်နှုန်းဖြင့် လာကူရသည်ဟုဆိုပါသည်။ နေ့ခင်းနေရောင်ဖြင့်သာ အိုးဖုတ်ရမည်မို့ နေပူပြင်းသည့်အချိန် မွန်းတည့်ဆယ့်နှစ်နာရီဝန်းကျင်ဆို အိုးဖုတ်မည့်အိမ်တွင် ရွာသူရွာသားတွေဆုံကြပြီ။ အတော်အားကုန်မည့် အလုပ်ပေမို့ များသောအားဖြင့် အမျိုးသားတွေလုပ်ရ၏။ အိုးဖုတ်မည့်အိမ်ဝင်းကွင်းပြင် နေပူပူတွင် ဖုတ်ရမည်ဖြစ်သည်။ ဖုတ်မည့်အိမ်ကွင်းပြင်တွင် သစ်ရွက်ခြောက်များကို အရင်ခင်းရသည်။ သစ်ရွက်ပေါ်မှာတော့ ထင်းတွေထပ်ခင်းရသည်။ ထင်းအပေါ်ကျ အိုးတွေကို ခရုပတ်ခွေပုံစံ အထပ်ထပ်စီရတာဖြစ်သည်။ စီပြီးအိုးတွေပေါ်မှာ ကောက်ရိုးထပ်ခင်း၊ ကောက်ရိုးပေါ်မှာ ရေဆွတ်ထားသောပြာအစို ထပ်တင်၍ ဖုတ်ရတာဖြစ်သည်။ အဲသည်လို လာကူသည့် ရွာသားတွေကို အိုးလုပ်တဲ့အိမ်ရှင်က အခကြေးငွေပေးရန်မလိုပါ။ အိုးဖုတ်တဲ့နေရာနား အရိပ်ကောင်းကောင်းမှာ ဖျာတစ်ချပ်ခင်းပေးပြီး ရေနွေးအိုးတည်ပေးထားသည်။ အဆာပြေမုန့်လက်ဆောင်း၊ လက်ဖက်သုပ်၊ ကြံသကာ၊ မုန့်ဟင်းခါး၊ ထန်းလျက် စသည့်မုန့်တစ်မျိုးမျိုး ကျွေးမွေးတတ်သည်။ ညနေစောင်း အိုးတွေစီပြီး ဖုတ်ထားသည့်အဆင့် ရောက်ပြီဆိုလျှင်တော့ လာကူတဲ့သူတွေ အလုပ်ပြီးပြီမို့ အရက်ကြမ်းလေးများဖြင့် ဧည့်ခံရသည်။

အိုးဖုတ်တာက သုံးညအိပ်လေးရက်လောက်ကြာပြီး အဲဒီလိုရက်တွေဆို အိုးလုပ်သူတွေ ညကောင်းကောင်းမအိပ်ရတော့။ အိုးတွေမီးအရှိန်ကြောင့် မည်းမသွားစေရန် ဂရုစိုက်ရသည်။ တုတ်တစ်ချောင်းဖြင့် လေပေါက်လေးတွေ သွားဖောက်ပေးရသည်။ အိုးဖုတ်တဲ့အချိန် ရာသီဥတုကောင်းရင်တော့ အိုးဖုတ်တဲ့လုပ်ငန်း အထမြောက်အောင်မြင်ပေသိ၊ ရုတ်တရက် မိုးလေကျလာပြီဆိုရင်ဖြင့် အိုးဖုတ်သူတွေ ဒုက္ခရောက်ကြပြီ။ အိုးတွေမှာ
တဖြည်းဖြည်းအရည်ပျော်ကာ မြေသို့ပြားပြားဝပ်သွားကြသည်ဟုဆိုသည်။

‘‘တစ်ဖိုဆိုရင် ဆယ်သိန်းကျော်တယ်။ လုပ်အားခတွေအပြင် ထင်းဖိုးတွေ၊ ကောက်ရိုးဖိုးတွေပါ ရှုံးကုန်တာ။ တစ်နှစ်ကဆို ရွာထဲက ငါးဖိုလောက်ကို ပျက်သွားတာ’’ဟု ရန္တပိုရွာမှ အိုးလုပ်ငန်းလုပ်ကိုင်သူ ဦးသိန်းဦးကဆိုသည်။

နာဂစ်ဖြစ်တုန်းက မိမိတို့ဒေသထွက်အိုးတွေ သုံးစွဲလေ့ရှိသည့် မြစ်ဝကျွန်းပေါ်ဒေသတွင် အပျက်အစီးများခဲ့တာမို့ အိုးတွေ ရောင်းအားကျခဲ့သည်ဟု ရန္တပိုရွာ အိုးလုပ်ငန်းလုပ်သူများကပြောသည်။ အဲဒီဒေသကလူတွေက အသက်နဲ့ကိုယ်ပင် အိုးစားကွဲခဲ့ကြချိန်၊ ရေအိုးလေးတစ်လုံးတည်ဖို့တောင် မဖြစ်နိုင်ကြတော့တာမို့ ရန္တပိုရွာထိပင် နာဂစ်ဒဏ်ရိုက်ခတ်တာခံခဲ့ရသည်။

‘‘အဲဒီတုန်းက ရေအိုးတွေ အိမ်ဝင်းထဲ အပြည့်မှောက်ထားရတာ။ ရေညှိတွေတောင် တက်တယ်’’ဟု မခင်မာချိုကပြောပြသည်။

ယခုလို ပူပြင်းစပြုလာသည့် နွေဦးပေါက်ကာလအချိန်အခါမျိုးဆို မြန်မာလူမျိုးဓလေ့ ရေအိုးအသစ်လဲကြပြီ။ မိုးတွင်းနဲ့ တဆောင်းလုံး ဘာသိဘာသာထားခဲ့ကြသည့် မိမိတို့အိမ်အတွင်းက သဲရေအိုးတွေရဲ့အခြေအနေ ဆန်းစစ်ကြပြီ။ မှုန်တေတေဖြစ်လာတာမျိုး၊ သဲကုန်ပြီး မအေးတော့တာမျိုးဆို ရေအိုးအသစ်ဝယ်ဖို့ စဉ်းစားကြပြီ။ မြန်မာလူမျိုးတော်တော်များများ သဲအိုးကို မက်ကြသည်မှာလည်း ဆန်းတော့မဆန်း။ ညဘက်တစ်ရေးနိုးသည့်အချိန်၊ နံနက်ခင်းအိပ်ရာထသည့်အချိန်၊ နေ့ခင်းနေ့လယ်ဘက် အပြင်ကပြန်လာသည့်အချိန်ဆို သဲအိုးလေးထဲက ရေအေးအေးသောက်ရသည်မှာ အရသာရှိလိုက်သည့်ဖြစ်ခြင်း။ မြန်မာလူမျိုးတော်တော်များများကတော့ အအေးဆုံးလဖြစ်တဲ့ ပြာသိုလမှာလုပ်တဲ့ ပြာသိုအိုးကို အမက်မောဆုံးဟု အိုးလုပ်ငန်းလုပ်ကိုင်သူများကဆိုပါသည်။

အချို့သဲအိုးမက်မောသူများဆို သဲအိုးနှစ်လုံး တစ်ခါတည်းဝယ်သွားသည်။ လေးငါးရက်လောက် စမ်းသောက်ပြီး မအေးဘူးဆို အပိုဝယ်လာသည့်အိုး ချက်ချင်းလဲပစ်သတဲ့။ အချို့တွေကျ ရေအိုးဆိုင်တွေမှာ ၀ယ်ရတာအားမရဘဲ ဖိုအထိလာမှာတတ်သူတွေလည်း ရှိသည်ဟု အိုးလုပ်ငန်းလုပ်ကိုင်သူများက ဆိုပါသည်။ အိုးတစ်လုံးကို သဲများများဖြင့် လုပ်ခိုင်းသည်။ နောက်တစ်လုံးကို ပုံမှန်သဲအိုးတစ်လုံးဝယ်သည်။ သဲများတဲ့အလုံးထဲ ရေထည့်၊ အောက်ကစဥ့်အိုးခံ၊ စဥ့်အိုးထဲကျလာတဲ့ရေကိုမှ နောက်ထပ်သဲအိုးတစ်လုံးထဲ ထပ်ထည့်ကာ သောက်တတ်ကြသူတွေလည်းရှိသည်ဟု အိုးလုပ်ငန်းလုပ်ကိုင်သူများကပြောပါသည်။

မိမိတို့လုပ်တဲ့အိုးတွေကို မက်မက်မောမောသုံးစွဲကြသည်မို့ အကွဲအနာများ မပါသွားစေရန် ဂရုစိုက်ရသည်ဟု ရန္တပိုရွာ အိုးလုပ်ငန်းလုပ်ကိုင်သူများကဆိုပါသည်။

‘‘ဒီမှာသာ သုံးလေးရာတန်တာ။ သူတို့ဆီရောက်သွားရင် တစ်ထောင်လောက်ဖြစ်ကုန်တာဆိုတော့ အကွဲတွေဘာတွေ ပါသွားမှာစိုးတယ်။ ဒီမှာက တစ်လုံးလောက်ပစ်လိုက်လည်း ဘာမှမဖြစ်ဘူး’’ဟု မခင်မာချိုကဆိုပါသည်။ ရေအိုးလေးကို လှအောင်ပအောင်၊ အေးမြအောင် စိတ်ထဲထားပြီး လုပ်နေရသည့်အတွက် ကုသိုလ်ရသည်ထင်ကြောင်း ရန္တပိုရွာသူများကပြောသည်။

‘‘ပင်ပန်းပေမယ့် ကိုယ့်အလုပ်က အကုသိုလ်အတော်ကင်းတဲ့အလုပ်လို့တွေးပြီး ကြည်နူးရတယ်’’ဟု ရန္တပိုရွာသူတစ်ဦးကပြောပြသည်။

မြန်မာလူမျိုးများ ရေအိုးအေးအေးလေးကို မိမိတို့တစ်အိမ်တည်း သောက်ရရုံတင်အားမရတတ်။ လမ်းပေါ်က လမ်းသွားလမ်းလာတွေပါ သောက်ရအောင် ရေချမ်းစင်ထားတတ်သည့်ဓလေ့ကလည်း ရှိပါသေးသည်။ မိမိတို့အိမ်ရှေ့ အရိပ်ကောင်းကောင်း သစ်ပင်တစ်ပင်ရှိပြီဆို ရေအိုးစင်လေး တည်ထားတတ်ကြသည်။ လမ်းသွားလမ်းလာတွေ အားရပါးရသောက်သွားတာမြင်ရင် ပီတိတွေဖြာတတ်ကြသည်။ ရေကုန်လောက်ပြီဆို အပြေးအလွှား သွားဖြည့်တတ်ကြသည်။ ယခုတော့
ထိုဓလေ့က မြို့ပေါ်မှာနည်းသွားလေပြီ။ သို့ပေသိ ကျေးလက်တောရွာမှာတော့ အတန်အသင့်ရှိနေတုန်း။ ခေတ်ကာလပြောင်းလာတော့ အရင်လိုအုန်းမှုတ်ခွက်ကို
အရိုးတပ်တာတွေ သိပ်မတွေ့ရတော့။ ပလတ်စတစ်ခွက်လေးတွေဖြစ်ကုန်သည်။ ရေအိုးစင်တွေကို ရွာအ၀င်တို့၊ တစ်ရွာနဲ့တစ်ရွာအကူး ခရီးတစ်ဝက်လောက်က အရိပ်ကောင်းကောင်း အပင်အောက်မှာတို့တွင် တည်ထားတတ်ကြသည်။

အဲဒီ ရေအိုးစင်တွေ တည်ထားသည့် ရေအိုးစင်အလှူရှင်က ရွာကနေ ဆိုင်ကယ်တစ်စီးဖြင့် ပလတ်စတစ်ပုံးများဖြင့် ထည့်လာသည့်ရေများကို လာလာဖြည့်သွားတတ်ကြသည်။ သောက်ရေခွက်လေးတွေကို ဆေးကြောပေးသွားတတ်ကြသည်။ ထိုရေအိုးစင်လေးတွေက တောသွားတောပြန်တွေ၊ မြို့နှင့်တော ကုန်ကူးနေသူတွေ၏ အိုအေစစ်လေးတွေလို့ ပြောရင်လည်းမမှားနိုင်။‘‘ရေအိုးစင်တည်ဖို့ လာဝယ်တယ်ဆို ရောင်းမနေဘူး။ ပေးပစ်လိုက်ကြတာပဲ’’ဟု အိုးလုပ်ငန်းလုပ်သူ ဦးသိန်းဦးကပြောသည်။

ဒီနှစ် နွေဦးပေါက်မှာတော့ဖြင့် အိုးတွေ ဈေးကောင်းကာ အတော်လေးလုပ်နေရသည်ဟု ရန္တပိုရွာသူများကဆိုသည်။ အရင်နှစ်တွေက အိုးတစ်လုံးနှစ်ရာ့ငါးဆယ်၊ သုံးရာလောက်သာ ပေးရပေမယ့် ဒီနှစ်ကတော့ လေးရာလောက်ရနေသည်ဟုဆိုသည်။

‘‘ခတ်လိုက်ရတာ (အိုးကိုရိုက်ရတာ) လက်မောင်းကိုအောင့်လို့’’ဟု ရန္တပိုရွာသူ အိုးလုပ်ငန်းလုပ်သူ မခင်မာချိုကပြောသည်။ နည်းပညာတွေ မြင့်မားလာတာကြောင့် ရေအေးအေးတစ်ခွက်သောက်ရဖို့ ဘယ်လောက်ပင်လွယ်ကူနေပါစေ။ ခက်ခက်ခဲခဲနှင့်ရလာသည့် သဲအိုးထဲက ရေအေးအေးလေးတွေကိုတော့ဖြင့် မက်မက်မောမော သောက်နေကြသူများကတော့ ရှိနေတုန်းပင်ဖြစ်ပါသည်။

ဓာတ်ပုံ − ညီညီဇော်
ကြေးမုံ

https://www.facebook.com/myanmakyaymon/photos/a.623687667672709.1073741828.612