တခါတလေမှာ တချို့ စားစရာတွေက အလွယ်တကူ ဝယ်ယူလို့ မရနိုင်ဘဲ … ကိုယ်နှစ်သက်လွန်းတဲ့ အစားအစာ ဖြစ်နေတာကြောင့် ရောင်းတဲ့ဆိုင်ကို တကူးတက သွားရောက်ရှာဖွေ ဝယ်ယူရတာမျိုး ကြုံရတတ်ပါတယ် …။
ဒီလိုအချိန်မျိုးမှာ မိမိနှစ်သက်တဲ့ အစားအစာလေးအကြောင်း လေ့လာထားမယ်ဆိုရင် ကိုယ်တိုင် လက်စွမ်းပြခွင့် ရသလို … မိသားစု၊ မိတ်ဆွေ သူငယ်ချင်းတွေရဲ့ ချီးကျူးဂုဏ်ပြုမှုကိုလည်း ခံစားရရှိစေမှာပါ …။
ဒီတပတ်တော့ အလွယ်တကူ ရောင်းလေ့မရှိတဲ့ ဘဲသားမုန့် အကြောင်း တင်ဆက် လိုက်ပါတယ် …။
ဂျုံသား နယ်ရတဲ့ အလုပ်တခုကတော့ … အတော်လေး လက်ဝင်ပါတယ် …။ ဝါသနာပါသူများ စိတ်ရှည်စွာ စမ်းသပ်ကြည့်နိုင်မယ့် အချိုးလေးကို ဖော်ပြပေးပါမယ် …။
ကြက်သား (သို့) ဘဲသားမုန့် (Chicken or Duck Puff)
အပြင်တလွှာအတွက်
ဂျုံနုမှုန့် – ၅၀၀ ဂရမ်
မာဂျရင်း – ၁၀၀ ဂရမ်
ဆား – ၁ ဇွန်း (လက်ဖက်ရည်ဇွန်း)
ရေအေး – ၁ ခွက် (သို့) ၂၂၀ မီလီမီတာ
ဂျုံမှုန့်နဲ့ ဆားကို သမအောင်မွှေပြီး မာဂျရင်းထည့်နယ်ပါ။ ရေကို နည်းနည်းစီ ထည့်ပြီး ညက်နေတဲ့ မုန့်သားတခု ရသည်အထိ နယ်ပါ။
နယ်ထားတဲ့ မုန့်သားကို ခပ်ကြမ်းကြမ်း လုံးထားပါ။
အတွင်းတလွှာအတွက်
ဂျုံ – ၂၅၀ ဂရမ်
မာဂျရင်း – ၁၅၀ ဂရမ်
ဒီ ၂ မျိုးထဲကိုပဲ အထက်ပါအတိုင်း နယ်ပြီး လုံးထားပါ။
ပထမအလွှာမုန့်သားကို မုန့်လှိမ့်တုံး (သို့) ပုလင်းအသုံးပြုပြီး အနည်းငယ် ပြန့်သွားအောင်ဖြန့်ပါ။ ဒုတိယ မုန့်သားကိုလည်း ထိုနည်းအတိုင်း ပြုလုပ်ပြီး ပထမအလွှာပေါ် တင်ပေးပါ။
ထို့နောက် မုန့်သား ၂ ခုကို ၃ – ၄ ထပ်ရအောင် လိပ်ပေးပါ။ ပလပ်စတစ် အပါးစလေးအုပ်ပြီး ရေခဲသေတ္တာမှာ ၁၅ မိနစ်လောက် အအေးခံထားပါ။ အဲဒီအချိန်မှာ အတွင်းသားအစာအတွက် ပြင်ဆင်ပါမယ် …။
အတွင်းအစာအတွက်
ကြက်သား (သို့) ဘဲသား – ၅၀၀ ဂရမ် (ခပ်သေးသေးအတုံး တုံးရန်)
အာလူး – ၂ လုံး (၁ စင်တီအရွယ် အတုံးလေးတုံးရန်)
ကြက်သွန်နီ – ၃လုံး (၁ စင်တီအရွယ် အတုံးလေးများတုံးရန်)
ငရုပ်စပ်မှုန့် – ၁ ဇွန်း (ထမင်းစားဇွန်း)
မဆလာ – ၁ ဇွန်း (လက်ဖက်ရည်ဇွန်း)
ကြက်သွန်ဖြူ + ချင်း – အနည်းငယ်စီ (နုပ်နုပ်စဉ်း)
ဆား + ကြက်သားမှုန့် – သင့်တော်သလို
သကြား – ၁ ဇွန်း (လက်ဖက်ရည်ဇွန်း)
ပထမဆုံး ကြက်သားတွေကို အိုးကင်းပူ တိုက်တဲ့ပုံစံနဲ့ ရေခမ်းသွားအောင် ပြုလုပ်ပါ။ ရေခမ်းသွားရင် အအေးခံထားပါ။
ဒယ်အိုးထဲမှာ အာလူးတွေကို ထည့်ကြော်ပါ။ အနည်းငယ် နွမ်းသွားရင် နနွင်းမှုန့် အနည်းငယ်နဲ့အတူ ကြက်သွန်ဖြူနဲ့ ချင်း ပေါင်းထည့်ပါ။
အနံ့မွှေးလာပြီဆိုရင် ကြက်သွန်နီနဲ့ ကြက်သားတွေ ပေါင်းထည့်ပြီး ငရုတ်စပ်မှုန့်၊ ဆား၊ သကြား၊ ကြက်သားမှုန့်
တို့နဲ့ အရသာသွင်းပါ။ ဖြန့်ပြီး အအေးခံထားပါ …။
အဲဒီ အချိန်မှာ ရေခဲသေတ္တာထဲက အအေးခံထားတဲ့ ဂျုံသားလိပ်ကို ထုတ်ပြီး ၁၆ ကနေ ၂၀ ခုအထိ အညီအညာ ပိုင်းဖြတ်ပါ။
ပိုင်းဖြတ်စလေးတွေကို ဂျုံမှုန့်ဖြူးထားတဲ့ စားပွဲပေါ်မှာ လှိမ့်တုံးလေး အသုံးပြုကာ ၄ လက်မ အဝိုင်းငယ် ရအောင်လုပ်ပါ။ (မုန့်သား ၂ ခုကို ၃ – ၄ ထပ် ရအောင် လိပ်ထားတဲ့အတွက် မုန့်သားမှာ အရစ်အရစ် ပုံလေးတွေပေါ်နေပါမယ်)။
လက်ကို ဂျုံမှုန့်လူးကိုင်ပြီး အတွင်းအစာကို ၁ ဇွန်းသာသာခန့်ဖြည့်ကာ ခေါက်ချိုးညီ ခေါက်လိုက်ပါ …။
မိမိလက်ပေါ်မှာရှိတဲ့ ဘယ်ဖက်အစွန်းထောင့် ကလေးကို ၄၅ ဒီဂရီလောက် ခေါက်ချလိုက်ပါ …။ အဲဒီနောက်မှ တဆင့် လက်မ အားကို အသုံးပြုပြီး မုန့်အနားသားလေးတွေကို ထိုးခေါက်သွားမယ်ဆိုရင် ညီညာလှပစွာ ပုံဖော်ထားတဲ့
အနားသား အစွန်းသတ်လေးတွေနဲ့ လှပနေပါမယ် …။
အားလုံး ထိုနည်းအတိုင်း ပြုလုပ်ပြီးပြီဆိုမှ … ဆီ (သာမန်အပူချိန်) မှာ ရွှေအိုရောင်ရအောင်ကြော်ပါ။ အအေးခံပြီးရင်တော့ လက်ဖက်ရည်၊ ကော်ဖီတို့နဲ့ တည်ခင်းဧည့်ခံ စားသောက်နိုင်ပါပြီ။
http://
No comments:
Post a Comment